મોટેરાથી ગાંધીનગર સુધીના 20 કિમીના બીજા તબક્કાની ટ્રાયલ રન માર્ચમાં શરૂ થશેઃ ગુજરાત મેટ્રો રેલ કોર્પોરેશન લિમિટેડ
અમદાવાદ ગાંધીનગર વચ્ચેની કડીને જોડવા માટે મેટ્રો ટ્રેન સુવિધા ટૂંક સમયમાં ઉપલબ્ધ થશે. મોટેરાથી ગાંધીનગર ગિફ્ટ સિટી સુધીની મેટ્રો ટ્રેન સર્વિસના બીજા ફેઝની કામગીરી પૂર્ણ થવાની તૈયારી છે. મેટ્રો રેલના ફેઝ-ટુ અંતર્ગત સાબરમતી મોટેરા સ્ટેડિયમથી ગાંધીનગર ગિફ્ટ સિટી સુધી મેટ્રો ટ્રેન દોડાવવાનું આયોજન છે. ગુજરાત મેટ્રો રેલ કોર્પોરેશન દ્વારા ખૂબ જ ઝડપથી કામગીરીને આખરી ઓપ આપવામાં આવી રહ્યો છે. 32 કરોડના ખર્ચે નિર્માણ કરાયેલા ગાંધીનગરના આઈકોનિક મોડલ રોડના રૂટ પર મેટ્રો ટ્રેનની પ્રી-ટ્રાયલ પણ શરૂ કરી દેવામાં આવી છે.
મેટ્રો ટ્રેનનું ટ્રાયલ રન આગામી માર્ચ-એપ્રિલ મહિનામાં કરવાની જાહેરાતો વચ્ચે આજે કોબા સ્ટેશનથી રાયસણ વૃંદાવન બંગલા સામેના મેટ્રો ટ્રેક પરથી મેટ્રો ટ્રેન પસાર કરાઈ હતી. લગભગ દોઢેક કિલો મીટરનાં આ રૂટ ઉપર મેટ્રો ટ્રેનનો પ્રિ ટ્રાયલ રન લેવામાં આવ્યો હતો. આજે પ્રિ ટ્રાયલ રન લેવામાં આવતા ટૂંક સમયમાં જ ગાંધીનગરના લોકોને મેટ્રો ટ્રેનનો લાભ મળી શકશે.
ગાંધીનગરમાં મેટ્રો ટ્રેનની કામગીરી રોકેટ ગતિએ શરૂ કરી દેવાઈ છે. અમદાવાદ મેટ્રો રેલ પ્રોજેક્ટ ફેઝ-2 (મોટેરા થી ગાંધીનગર)ની કામગીરી પૂરજોશમાં ચાલી રહી છે. સાબરમતી નદી પર ગિફ્ટ સિટી પાસે શાહપુર બ્રિજના 23 સ્પાનની કામગીરી પૂર્ણતાનાં આરે છે.
અમદાવાદ-ગાંધીનગર મેટ્રો રેલ પ્રોજેકટ અંતર્ગત ફેઝ-2, મોટેરાથી ગાંધીનગરના રૂટ પર થઈ રહેલા રેલવે રૂટ અને સ્ટેશન્સના નિર્માણની કામગીરીનું મુખ્યમંત્રી ભૂપેન્દ્ર પટેલે નિરીક્ષણ કર્યું હતું. મોટેરા સ્ટેડિયમથી ગાંધીનગર સેક્ટર-1 સુધી ટ્રાયલ રન આગામી માર્ચ-એપ્રિલ મહિનામાં કરવામાં આવે તેવી શક્યતા છે.
