ભારતીય કેપ્ટન રોહિત શર્માએ આંતરરાષ્ટ્રીય ક્રિકેટમાં 18 હજાર રન પૂરા કર્યા
મોહમ્મદ શમીએ 7 ઓવરમાં 4 વિકેટ ઝડપી હતી, વર્લ્ડ કપ ઈતિહાસનો બેસ્ટ બોલર બન્યો શમી
ભારતે 20 વર્ષ પછી વર્લ્ડ કપમાં ઇંગ્લેન્ડને હરાવ્યું
ભારત અને ઇંગ્લેન્ડ વચ્ચે ગઈકાલે વન-ડે વર્લ્ડ કપ 2023ની મેચમાં ભારતે ઇંગ્લેન્ડને 100 રનથી હરાવ્યું હતું. ભારતે વન-ડે વર્લ્ડ કપ 2023માં સતત છઠ્ઠી જીત હાંસલ કરીને પોઈન્ટ્સ ટેબલ પર ટોપ પર પહોંચી ગયું છે. ટીમ ઈન્ડિયાએ 20 વર્ષ બાદ વર્લ્ડ કપમાં ઇંગ્લેન્ડને હરાવ્યું છે. આ પેહલા 2003માં ભારતે ડરબનના મેદાન પર 82 રને મેચ જીતી હતી.
રવિવારે લખનઉના એકાના સ્ટેડિયમમાં ઇંગ્લેન્ડે ટોસ જીતીને ફિલ્ડિંગ કરવાનો નિર્ણય લીધો હતો. ટોસ હાર્યા બાદ ભારતીય ટીમે બેટિંગ કરતા 50 ઓવરમાં 9 વિકેટે 229 રન બનાવ્યા હતા. જ્યારે ઇંગ્લેન્ડની ટીમ 34.5 ઓવરમાં 129 રન બનાવીને ઓલઆઉટ થઈ ગઈ હતી. રોહિત શર્માની કેપ્ટનશિપની ઇનિંગ્સ અને બોલરોના જબરદસ્ત પ્રદર્શને વર્લ્ડ કપમાં ભારતની જીતની સફરને રોકાવા ન દીધી.
પ્રથમ બેટીંગ કરતા ભારતીય ટીમ તરફથી કેપ્ટન રોહિત શર્માએ સૌથી વધુ 87 રન બનાવ્યા હતા. કેએલ રાહુલે 39 રનની ઇનિંગ રમી હતી. આ પહેલા શુભમન ગિલ 9 રન, વિરાટ કોહલી 0 અને શ્રેયસ અય્યર 4 રન બનાવીને આઉટ થયા હતા. ઈંગ્લેંડની ટીમ તરફથી ડેવિડ વિલીએ ત્રણ વિકેટ ઝડપી હતી. આદિલ રાશિદ અને માર્ક વૂડે 2-2 વિકેટ લીધી હતી.
230 રનના લક્ષ્યાંકને ચેઝ કરવા ઉતરેલી ઇંગ્લિશ ટીમની શરૂઆત સારી રહી હતી. ટીમે 4 ઓવરમાં 26 રન બનાવ્યા હતા.બેયરસ્ટોએ 14 અને માલને 16 રન બનાવ્યા હતા, જ્યારે રૂટ અને સ્ટોક્સ ખાતું પણ ખોલી શક્યા ન હતા. આ મેચમાં મોહમ્મદ શમીએ 4 અને જસપ્રીત બુમરાહે 3 વિકેટ ઝડપી હતી. જ્યારે કુલદીપ યાદવે 2 અને રવીન્દ્ર જાડેજાએ 1 વિકેટ ઝડપી હતી.
આ મેચમાં ભારતીય કેપ્ટન રોહીત શર્માએ શાનદાર 87 રન બનાવ્યા હતા. આ સાથે જ રોહિત શર્માએ આંતરરાષ્ટ્રીય ક્રિકેટમાં તેનાં 18 હજાર રન પૂરા કરી લીધા છે. રોહિતે પોતાની 457મી ઇનિંગમાં આ સિદ્ધિ મેળવી છે. તે ભારત માટે સૌથી વધુ રન બનાવનાર ટોપ-5 ક્લબમાં સામેલ થઈ ગયો છે. આ ક્લબમાં સચિન તેંડુલકર, વિરાટ કોહલી, રાહુલ દ્રવિડ અને સૌરવ ગાંગુલીના નામ છે.
શમી બન્યો વર્લ્ડ કપ ઈતિહાસનો બેસ્ટ બોલર
ભારતની આ જીતમાં ફાસ્ટ બોલરોએ મહત્વપૂર્ણ યોગદાન આપ્યું હતું. જસપ્રીત બુમરાહે 3 જયારે મોહમ્મદ શમીએ 4 વિકેટ ઝડપી હતી. આ સાથે જ શમી વન-ડે વર્લ્ડ કપના ઈતિહાસમાં બેસ્ટ બોલર બની ગયો છે.
રોહિત શર્મા બન્યો 100 મેચમાં કેપ્ટનશિપ કરનારો સાતમો ખેલાડી
રોહિત શર્મા ત્રણેય ફોર્મેટમાં ભારતીય ટીમનું નેતૃત્વ કરનાર સાતમો એવો કેપ્ટન બની ગયો છે જેણે 100 કે તેથી વધુ મેચમાં ભારતીય ટીમ માટે કેપ્ટનશીપ કરી છે. રોહિત શર્માએ ભારત માટે 51 T20I, 39 ODI અને 9 ટેસ્ટ મેચમાં કેપ્ટનશીપ કરી છે. રોહિતનો રેકોર્ડ કેપ્ટન તરીકે ખુબ સારો રહ્યો છે. ODI World Cup 2023માં ભારત અને ઇંગ્લેન્ડ વચ્ચેની મેચ પહેલા રોહિતે કુલ 99 ઇન્ટરનેશનલ મેચમાં ભારતીય ટીમનું નેતૃત્વ કર્યું છે. આ 99 મેચોમાંથી ભારતે 77 મેચમાં જીત મેળવી છે. અન્ય કોઈ ભારતીય કેપ્ટનની જીતની ટકાવારી આટલી નથી. એમએસ ધોનીએ સૌથી વધુ 332 મેચમાં કેપ્ટનશિપ કરી છે.
