મુંબઈ-અમદાવાદ બુલેટ ટ્રેન કોરિડોર પર ઇલેક્ટ્રિફિકેશનનું કામ શરૂ, બુલેટ ટ્રેનનું ટ્રાયલ ક્યારે અને ક્યાં થશે તે પણ રેલમંત્રીએ જણાવ્યુ

ગુજરાતના સુરત-બીલીમોરા બુલેટ ટ્રેન સ્ટેશનની વચ્ચે ભોયતળીયાના સ્તરથી 14 મીટરની ઊંચાઇએ વાયડક્ટ પર પ્રથમ બે સ્ટીલના માસ્ટ ઉભા કરવામાં આવ્યા છે.

દેશના પ્રથમ બુલેટ ટ્રેન પ્રોજેક્ટનું કામ ઝડપથી આગળ વધી રહ્યું છે. ગુજરાતમાં બુલેટ ટ્રેન કોરિડોર પર વીજળીકરણનું કામ શરૂ પણ કરવામાં આવ્યું છે. NHSRCL તરફથી મળેલી આ અપડેટ રેલવે મંત્રી અશ્વિની વૈષ્ણવે પોતે સોશિયલ મીડિયા પ્લેટફોર્મ X પર શેર કરી છે.

ગુજરાતમાં દેશના પ્રથમ બુલેટ ટ્રેન પ્રોજેક્ટનું કામ ઝડપથી આગળ વધી રહ્યું છે. નવીનતમ અપડેટમાં, મુંબઈ-અમદાવાદ બુલેટ ટ્રેન કોરિડોર માટે વીજળીકરણનું કામ શરૂ થઈ ગયું છે. જે અંતર્ગત ગુજરાતમાં સુરત-બિલીમોરા બુલેટ ટ્રેન સ્ટેશનો વચ્ચે જમીનથી 14 મીટરની ઊંચાઈએ વાયડક્ટ પર પ્રથમ બે સ્ટીલ માસ્ટ સ્થાપિત કરવામાં આવ્યા છે. કુલ મળીને, કોરિડોર પર 9.5 થી 14.5 મીટરની ઊંચાઈવાળા 20,000 થી વધુ માસ્ટ સ્થાપિત કરવામાં આવશે. રેલ્વે મંત્રી અશ્વિની વૈષ્ણવે સોશિયલ મીડિયા પ્લેટફોર્મ X પર આ અંગે પોસ્ટ કરીને ખુશી વ્યક્ત કરી છે.

મેક ઇન ઇન્ડિયા નીતિને પ્રોત્સાહન

બુલેટ ટ્રેન કોરિડોર પર સ્થાપિત આ માસ્ટ ઓવરહેડ ઇક્વિપમેન્ટ (OHE) સિસ્ટમને સપોર્ટ કરશે. જેમાં ઓવરહેડ વાયર, અર્થિંગ સિસ્ટમ, ફિટિંગ અને સંબંધિત એસેસરીઝનો સમાવેશ થાય છે. જે બુલેટ ટ્રેન ચલાવવા માટે યોગ્ય MAHSR કોરિડોર માટે સંપૂર્ણ 2×25 kV ઓવરહેડ ટ્રેક્શન સિસ્ટમ બનાવશે. મેક ઇન ઇન્ડિયા નીતિને પ્રોત્સાહન આપતા, આ OHE માસ્ટ્સ જાપાનીઝ સ્ટાન્ડર્ડ ડિઝાઇન અને સ્પષ્ટીકરણો અનુસાર ભારતમાં બનાવવામાં આવ્યા છે અને હાઇ-સ્પીડ ટ્રેનો માટે ઓવરહેડ ટ્રેક્શનને સપોર્ટ કરશે.

બુલેટ ટ્રેન ટ્રાયલ ક્યારે અને ક્યાં થશે?

બુલેટ ટ્રેન ટ્રાયલ સુરત-બિલીમોરા વચ્ચે થવાની ધારણા છે. કોરિડોરના વીજળીકરણ કાર્યની શરૂઆતથી આ સંકેત મળ્યો છે. બુલેટ ટ્રેન કોરિડોર પર વીજળીકરણ કાર્ય શરૂ થવાની માહિતી નેશનલ હાઇ સ્પીડ રેલ કોર્પોરેશન લિમિટેડ દ્વારા શેર કરવામાં આવી છે. ગુજરાતમાં બુલેટ ટ્રેનનું ટ્રાયલ 2026 માં શરૂ થવાની ધારણા છે. મુંબઈથી અમદાવાદ સુધીના બુલેટ ટ્રેન કોરિડોરની કુલ લંબાઈ 508 કિમી છે. આ રૂટ પર કુલ ૧૨ સ્ટેશન છે. જેમાંથી આઠ ગુજરાતમાં અને ચાર મહારાષ્ટ્રમાં છે. ગુજરાતમાં સાબરમતી, અમદાવાદ, આણંદ, વડોદરા, સુરત અને બીલીમોરા સ્ટેશન છે. સુરત અને બીલીમોરા વચ્ચેના કોરિડોરની લંબાઈ ૫૦ કિલોમીટર છે. આ સેક્શન પર કામ સૌથી અદ્યતન તબક્કામાં છે. આવી સ્થિતિમાં, બુલેટ ટ્રેનનું ટ્રાયલ આ સેક્શનમાં થવાની અપેક્ષા છે.