HMPV વાયરસ અંગે ગુજરાત સરકારના આરોગ્ય વિભાગે માર્ગદર્શિકા બહાર પાડી,
કોરોના વાઈરસ બાદ ચીનમાં ફેલાતા HMPV વાયરસના કેસ હવે ભારતમાં પણ નોંધાવા લાગ્યા છે. અમદાવાદમાં 2 મહિનાના બાળકમાં HMPV વાયરસના લક્ષણો જોવા મળ્યા છે. જેના ટેસ્ટિંગ માટે અમદાવાદ સિવિલ હોસ્પિટલની ટીમ પહોંચી છે. આ પહેલા સોમવારે સવારે કર્ણાટકમાં 3 મહિનાની છોકરી અને 8 મહિનાના છોકરામાં આ વાયરસ જોવા મળ્યો હતો. બંને બાળકોની બેંગલુરુની હોસ્પિટલમાં તપાસ કરવામાં આવી હતી.
અહેવાલો અનુસાર, 15 દિવસ પહેલા બાળકની તબિયત બગડતાં તેને હોસ્પિટલમાં દાખલ કરવામાં આવ્યો હતો. તેમને થોડા દિવસ વેન્ટિલેટર પર પણ રાખવામાં આવ્યો હતો. હવે એવું કહેવામાં આવી રહ્યું છે કે તપાસમાં HMPV વાયરસનું સંક્રમણ મળ્યું છે. જો કે, બાળકની તબિયત હવે સ્થિર છે. આ મુદ્દે ગુજરાતના આરોગ્ય વિભાગે જણાવ્યું હતું કે આ રિપોર્ટ ખાનગી હોસ્પિટલનો છે. અમારી લેબમાં તેનું પરીક્ષણ કરવામાં આવ્યું નથી.
કર્ણાટકમાં બંને કેસ અંગે કેન્દ્રીય સ્વાસ્થ્ય મંત્રાલયે કહ્યું કે બાળકો રૂટીન ચેકઅપ માટે હોસ્પિટલ પહોંચ્યા હતા. ટેસ્ટ કરાવ્યા બાદ તેમનો રિપોર્ટ પોઝિટિવ આવ્યો હતો. જો કે, કર્ણાટકના આરોગ્ય વિભાગે સ્પષ્ટતા કરી હતી કે બાળકોના નમૂનાઓનું પરીક્ષણ સરકારી લેબમાં નહીં પરંતુ ખાનગી હોસ્પિટલમાં કરવામાં આવ્યું હતું.
ગુજરાતના આરોગ્ય વિભાગે HMPV વાયરસ અંગે માર્ગદર્શિકા બહાર પાડી છે.
દેશમાં HMPVના સતત 3 કેસ સામે આવ્યા બાદ લોકોની ચિંતા વધી ગઈ છે. જોકે, સ્વાસ્થ્ય નિષ્ણાતોનું કહેવું છે કે આ વાયરસ ઘણો જૂનો છે અને તે કોરોના જેટલો ખતરનાક નથી. તે શ્વસન સંબંધી વાયરસ છે અને શરદી, ઉધરસ, તાવ તેના સામાન્ય લક્ષણો છે.
નિષ્ણાતોની ટીમ તપાસ કરશે
પ્રાથમિક માહિતી મુજબ રાજસ્થાનના ડુંગરપુરનો એક પરિવાર તેમના 2 મહિનાના બાળકને લઈને અમદાવાદની ખાનગી હોસ્પિટલમાં આવ્યો હતો. સારવાર દરમિયાન તેનો ખાનગી લેબમાં ટેસ્ટ કરવામાં આવ્યો હતો. હવે તેનો રિપોર્ટ પોઝિટિવ આવ્યો છે.
બાળકમાં HMPV વાયરસના લક્ષણો અંગે આરોગ્ય વિભાગને જાણ કરવામાં આવી છે. બાળકીની હોસ્પિટલમાં સારવાર ચાલી રહી છે. અમદાવાદ આરોગ્ય વિભાગે સિવિલ હોસ્પિટલના નિષ્ણાતોની ટીમને તપાસ માટે મોકલી છે. આ ટીમ પહેલા બાળકમાં શંકાસ્પદ HMPV વાયરસની તપાસ કરશે અને પછી રિપોર્ટના આધારે બાળકને ચેપ લાગ્યો છે કે નહીં તેની માહિતી આપશે.
પરિવાર રાજસ્થાનનો છે
મીડિયા રિપોર્ટ અનુસાર અમદાવાદ મ્યુનિસિપલ કોર્પોરેશનમાં આરોગ્ય વિભાગના ઈન્ચાર્જ આઈએએસ બીસી બી.સી.પરમારે જણાવ્યું કે પરિવાર રાજસ્થાનના ડુંગરપુરનો રહેવાસી છે અને દર્દી બે માસનું બાળક છે. ખાનગી હોસ્પિટલમાંથી રિપોર્ટ મળ્યો છે. આથી અમદાવાદ મ્યુનિસિપલ કોર્પોરેશનના સરકારી ડોક્ટર ભાવિન સોલંકીની આગેવાનીમાં એક ટીમ તપાસ માટે રવાના થઈ ગઈ છે. તપાસ બાદ માહિતી આપવામાં આવશે.
ગુજરાતના આરોગ્ય પ્રધાન ઋષિકેશ પટેલે જણાવ્યું હતું કે મારી પાસે હજુ સુધી આ બાબતે કોઈ સત્તાવાર માહિતી નથી. જ્યારે મને સત્તાવાર વિગતો મળશે, ત્યારે હું તેના વિશે કંઈક કહી શકીશ.
સિવિલ હોસ્પિટલ તંત્ર એલર્ટ
HMPV વાઇરસને લઈ અમદાવાદ સિવિલ હોસ્પિટલ તંત્ર એલર્ટ થઇ ગયું છે. સિવિલમાં HMPV વાઇરસના દર્દીઓ માટે આઇસોલેશન વોર્ડ તૈયાર કરાશે. બાળરોગ વિભાગને આ અંગે તૈયારીઓ કરવા સૂચના અપાઈ છે. આ અંગે માહિતી આપતા સિવિલ સુપ્રીટેન્ડન્ટ ડો. રાકેશ જોશીએ જણાવ્યું હતું કે આ પ્રકારના વાઇરસ માટે કોઈ વેક્સિન નથી કે કોઈ સ્પેસિફિક દવા નથી. જેને જેવા લક્ષણો એને એવી દવા આપવા માટે સૂચના અપાઈ છે. આ સાથે તેમણે લક્ષણો સાથે જાહેર જગ્યાઓ પર નહીં જવા માટે પણ અપીલ કરી છે.
