શહેર પોલીસે સોમવારે રાત્રે 11 વાગ્યાથી મંગળવારે સવારે 5 વાગ્યા સુધી સમગ્ર શહેરમાં કોમ્બિંગ કર્યું
અમદાવાદ શહેરમાં વધી રહેલા ગુનાહિત બનાવોને જોતા શહેર પોલીસે સોમવારે રાત્રે 11 વાગ્યાથી મંગળવારે સવારે 5 વાગ્યા સુધી સમગ્ર શહેરમાં કોમ્બિંગ કર્યું હતું. શહેર ક્રાઈમ બ્રાન્ચ, સેક્ટર-1, સેક્ટર-2, ક્રાઈમ બ્રાન્ચ, ટ્રાફિક પોલીસ, તમામ ઝોનના ડેપ્યુટી કમિશનર સહિતની ટીમો દ્વારા એક સાથે કરવામાં આવેલા કોમ્બિંગ દરમિયાન શહેરમાં 21 હજારથી વધુ વાહનોનું ચેકિંગ કરવામાં આવ્યું હતું. આ દરમિયાન પીધેલી હાલતમાં મળી આવેલા 470 લોકો ઝડપાયા હતા. તેમની સામે પ્રોહિબિશનનો કેસ નોંધવામાં આવ્યો છે. તેમની મેડિકલ તપાસ માટે મંગળવારે સવારથી બપોર સુધી સિવિલ હોસ્પિટલ અને સોલા સિવિલ હોસ્પિટલમાં પોલીસના વાહનોની કતાર જોવા મળી હતી. શહેર પોલીસે મંગળવારે રાત્રે કોમ્બિંગ પણ કર્યું હતું.
શહેરના સેક્ટર-1 અને 2ના એડિશનલ પોલીસ કમિશનર નીરજ બડગુજરે જણાવ્યું હતું કે, સમગ્ર શહેરમાં હાથ ધરાયેલા કોમ્બિંગ ઓપરેશન દરમિયાન શંકાસ્પદ વાહનોનું ચેકિંગ કરવામાં આવ્યું હતું. સોમવારે રાત્રે 11 વાગ્યાથી મંગળવારે સવારે 5 વાગ્યા સુધી 21 હજારથી વધુ વાહનોનું ચેકિંગ કરવામાં આવ્યું હતું. પોલીસે ટ્રાફિકના નિયમોનું ઉલ્લંઘન કરતા 1741 વાહનો ડીટેઈન કર્યા છે. તેમાંથી સૌથી વધુ 1113 વાહનો સેક્ટર-1 વિસ્તારમાંથી ડીટેઈન કરવામાં આવ્યા છે. સેક્ટર-2 વિસ્તારમાંથી 628 વાહનો ડીટેઇન કરાયા હતા. આ એવા વાહનો છે જેમના ડ્રાઇવર અને માલિકો પાસે જરૂરી દસ્તાવેજો નહોતા અથવા તેમની પાસે ડ્રાઇવિંગ લાઇસન્સ નહોતું. નિયમોની અવગણના કરનારા વાહનચાલકો પાસેથી 12 લાખ 82 હજારનો દંડ પણ વસૂલવામાં આવ્યો છે. 1685 ચલણ જારી કરવામાં આવ્યા છે. કોમ્બિંગ નાઈટમાં તમામ ઝોનના ડેપ્યુટી કમિશનર, તમામ પોલીસ સ્ટેશનના પોલીસ તેમજ ક્રાઈમ બ્રાન્ચની ટીમો અને ટ્રાફિક પોલીસની ટીમો પણ સામેલ થઈ હતી. 152 પીધેલી હાલતમાં વાહન ચલાવતા ઝડપાયા
બડગુજરના જણાવ્યા મુજબ, કોમ્બિંગ નાઈટ દરમિયાન 152 ડ્રાઈવરો નશાની હાલતમાં વાહન ચલાવતા ઝડપાયા હતા. તેમની સામે મોટર વ્હીકલ એક્ટ 185 હેઠળ કાર્યવાહી કરવામાં આવી હતી. આવા સૌથી વધુ 143 ડ્રાઇવરો સેક્ટર-2 વિસ્તારમાં (પૂર્વ અમદાવાદ) જ્યારે 54 પશ્ચિમ અમદાવાદ વિસ્તારમાં પકડાયા હતા. એટલું જ નહીં અન્ય 470 લોકો પીધેલી હાલતમાં ઝડપાયા હતા. જેમાં અનેક બુટલેગરોના અડ્ડા પર દરોડા પાડવામાં આવ્યા હતા, જ્યાં લોકો દારૂ પીતા પણ મળી આવ્યા હતા. જેમાં સેક્ટર 1 વિસ્તારમાંથી સૌથી વધુ 276 અને સેક્ટર 2 વિસ્તારમાંથી 194 ઝડપાયા હતા. સૂત્રોના જણાવ્યા અનુસાર આટલી મોટી સંખ્યામાં લોકો પહેલીવાર પીધેલી હાલતમાં ઝડપાયા છે. 31 ડિસેમ્બરની રાત્રે થયેલી કાર્યવાહી દરમિયાન પણ ઘણા લોકો પકડાયા નથી. આવી સ્થિતિમાં સવાલ એ થાય છે કે શહેરમાં દારૂબંધી છે તો આ લોકો દારૂ ક્યાંથી લાવીને પીવે છે. શું શહેરમાં દારૂબંધીનું ચુસ્તપણે પાલન થતું નથી?
