પીએમ મોદીએ કહ્યું કે આજે વિશ્વ પડકારોનો સામનો કરી રહ્યું છે અને તેના ઉકેલમાં બ્રિક્સ મહત્વની ભૂમિકા ભજવી શકે છે.
પીએમ મોદી BRICS સમિટમાં ભાગ લેવા માટે રશિયાના કઝાન પહોંચ્યા છે. BRICS સમિટનો બુધવારે બીજો દિવસ છે. PM મોદીએ આજે બે બેઠકમાં હાજરી આપી હતી. તેમણે આ મંચ પરથી દુનિયાને આતંકવાદના મુદ્દે એક થવાની અપીલ કરી હતી. તેમણે કહ્યું, ‘BRICS દેશોએ સાથે મળીને આતંકવાદ સામે લડવું પડશે. આના પર બેવડા ધોરણ ન હોવા જોઈએ.’
પીએમ નરેન્દ્ર મોદીએ બ્રિક્સ સમિટ દરમિયાન આજના પડકારજનક સમયમાં બ્રિક્સની ઉપયોગીતા ગણાવી હતી. પીએમ મોદીએ કહ્યું કે આખી દુનિયા બ્રિક્સ જૂથની સકારાત્મક ભૂમિકાની અપેક્ષા રાખે છે. પીએમ મોદીએ કહ્યું કે આજે વિશ્વ પડકારોનો સામનો કરી રહ્યું છે અને તેના ઉકેલમાં બ્રિક્સ મહત્વની ભૂમિકા ભજવી શકે છે.
પીએમ મોદીએ રશિયાના કાઝાનમાં બ્રિક્સ સમિટના સફળ આયોજન માટે રશિયાના રાષ્ટ્રપતિ વ્લાદિમીર પુતિનને પણ અભિનંદન પાઠવ્યા છે. તેમણે કહ્યું, “મારું માનવું છે કે સમાવેશક પ્લેટફોર્મ તરીકે બ્રિક્સ તમામ મુદ્દાઓ પર સકારાત્મક ભૂમિકા ભજવી શકે છે. અમે યુદ્ધને નહીં, સંવાદ અને કૂટનીતિને સમર્થન આપીએ છીએ. જેમ આપણે સાથે મળીને કોવિડ જેવા પડકારને હરાવીએ છીએ, તે જ રીતે અમે ભવિષ્યની પેઢીઓ માટે સુરક્ષિત, મજબૂત અને સમૃદ્ધ ભવિષ્ય માટેની નવી તકો સર્જન કરવા માટે સંપૂર્ણ રીતે સક્ષમ છીએ.
પીએમ મોદીએ આતંકવાદ અને ટેરર ફંડિંગનો સામનો કરવા માટે સહયોગની અપીલ કરી છે અને કહ્યું છે કે આવા ગંભીર મુદ્દાઓ પર બેવડા માપદંડ માટે કોઈ સ્થાન હોઈ શકે નહીં. તેમણે કહ્યું, “દેશના યુવાનોમાં કટ્ટરવાદને રોકવા માટે આપણે સક્રિય પગલાં લેવા જોઈએ. તેમણે કહ્યું છે કે આપણે સંયુક્ત રાષ્ટ્રમાં આંતરરાષ્ટ્રીય આતંકવાદ પર વ્યાપક સંમેલનના પેન્ડિંગ મુદ્દા પર સાથે મળીને કામ કરવું પડશે.
પીએમ મોદીએ આજે વિશ્વમાં વિવિધ પડકારોનો ઉલ્લેખ કર્યો. તેમાં યુદ્ધ, આર્થિક અનિશ્ચિતતા, જળવાયુ પરિવર્તન, આતંકવાદ અને દેશો વચ્ચે વિભાજનનો સમાવેશ થાય છે. તેમણે કહ્યું, “ટેક્નોલોજીના યુગમાં, સાયબર સુરક્ષા, ડીપ ફેક જેવા નવા પડકારો સામે આવ્યા છે. આવી સ્થિતિમાં બ્રિક્સ પાસેથી ઘણી અપેક્ષાઓ છે.”
તેમણે કહ્યું કે UNSCમાં સુધારો કરવો જરૂરી છે. અન્ય એક ભાષણમાં પીએમએ કહ્યું, ‘BRICS તેના નવા સ્વરૂપમાં વિશ્વની 40% માનવતા અને લગભગ 30% અર્થતંત્રનું પ્રતિનિધિત્વ કરે છે. સંસ્થાએ છેલ્લા બે દાયકામાં ઘણી સિદ્ધિઓ હાંસલ કરી છે. મને આશા છે કે BRICS વૈશ્વિક પડકારો માટે વધુ અસરકારક માધ્યમ તરીકે ઉભરી આવશે.’
પીએમ મોદીએ કહ્યું છે કે ભારત બ્રિક્સમાં નવા દેશોને આવકારવા તૈયાર છે પરંતુ આ સંદર્ભમાં તમામ નિર્ણયો સર્વસંમતિથી લેવા જોઈએ અને બ્રિક્સના સ્થાપક સભ્યોના વિચારોનું સન્માન કરવું જોઈએ. તેમણે કહ્યું, “ગયા વર્ષે બ્રિક્સમાં આફ્રિકન દેશોનો ઉમેરો થયો હતો. આ વર્ષે પણ રશિયાએ ગ્લોબલ સાઉથના ઘણા દેશોને આમંત્રિત કર્યા છે. મોદીએ કહ્યું, વિવિધ વિચારધારાઓના સંગમથી બનેલું બ્રિક્સ જૂથ આજે વિશ્વને આગળ વધવા માટે પ્રેરણા આપી રહ્યું છે.
સકારાત્મક સહકારની દિશા, એકબીજા માટે આદર અને સર્વસંમતિ સાથે આગળ વધવાની પરંપરા અમારા સહકારનો આધાર છે.” બ્રિક્સની સ્થાપના મૂળ બ્રાઝિલ, રશિયા, ભારત, ચીન અને દક્ષિણ આફ્રિકા દ્વારા કરવામાં આવી હતી અને ગયા વર્ષે ઇજિપ્ત, ઇથોપિયા, ઈરાન અને સંયુક્ત આરબ અમીરાતનો સમાવેશ કરીને જૂથનું વિસ્તરણ કરવામાં આવ્યું હતું.
