પાકિસ્તાની નિષ્ણાતો થયા ગુસ્સે, કહ્યું- તેમને શા માટે પાકિસ્તાનમાં બોલાવવામાં આવ્યા
વિવાદાસ્પદ ઈસ્લામિક ઉપદેશક ઝાકિર નાઈક હાલમાં શાહબાઝ શરીફ સરકારના આમંત્રણ પર પાકિસ્તાનમાં છે. પાકિસ્તાનમાં ઝાકીરના કાર્યક્રમો સતત આયોજિત થઈ રહ્યા છે અને સરકાર તેમનું સ્વાગત કરવામાં વ્યસ્ત છે. એક તરફ પાકિસ્તાન સરકાર ઝાકીરને સ્પેશિયલ બનાવવાનો પ્રયાસ કરી રહી છે તો બીજી તરફ ઝાકીરની હરકતોથી લોકો રોષે ભરાયા છે.
વાસ્તવમાં, ‘પાકિસ્તાન સ્વીટ હોમ ફાઉન્ડેશન’ નામની અનાથ છોકરીઓને મદદ કરતી પાકિસ્તાની એન.જી.ઓ.ના એક કાર્યક્રમનું આયોજન કરાયું હતું જેમાં ઝાકિર નાઈકને આમંત્રણ આપવામાં આવ્યું હતું. વિવાદાસ્પદ નિવેદનો આપવામાં માહેર ઝાકિર નાઈકે સખાવતના કાર્યક્રમમાં પણ કંઈક એવું કહી દીધું જેના લીધે વિવાદ છેડાઈ ગયો છે.
ઝાકિર નાઈક બુધવારે ઈસ્લામાબાદમાં આયોજિત એક ઈવેન્ટમાં અનાથ છોકરીઓને અભ્યાસમાં ઉત્કૃષ્ટ પ્રદર્શન બદલ ઍવોર્ડ આપવા માટે પહોંચ્યા હતા. આ કાર્યક્રમમાં સંચાલકે કેટલીક અનાથ વિદ્યાર્થિનીઓને ‘દીકરી’ કહેતાં જ ઝાકિર નાઈક ભડકી ઊઠ્યા હતા. અહીં જ્યારે તેમને કેટલીક અનાથ વિદ્યાર્થિનીઓને પુરસ્કાર આપવાનું કહેવામાં આવ્યું તો ઝાકિર નાઈક નાઈક સ્ટેજ પરથી નીચે ઉતરી ગયા હતા અને પછી કાર્યક્રમના સંચાલકો પર ભડકી ઉઠતાં એમણે કહ્યું હતું કે, ‘સંચાલક આ છોકરીઓને દીકરી કહીને સંબોધે છે એ ખોટું છે, ઇસ્લામિક સિદ્ધાંતોની વિરુદ્ધનું છે, કેમ કે આ છોકરીઓ બિન-મહરમ છે. તેમને સ્પર્શી ન શકાય અને દીકરી પણ ન કહી શકાય.’
બિન-મહરમ એટલે શું?
મહરમ અરબી ભાષાનો શબ્દ છે. આ શબ્દનો ઉપયોગ કુટુંબના સભ્યો માટે કરવામાં આવે છે. એવા સભ્યો જેની સાથે લગ્ન કરી શકાતા નથી. તેથી, બિન-મહરમનો અર્થ થાય, એવી વ્યક્તિ જે નજીકની સંબંધી નથી, જેમને તમે જાણતા નથી. તેથી એવી વ્યક્તિ લગ્ન માટે લાયક ગણાય છે. ઝાકિર નાઈકે પેલી અનાથ છોકરીઓને બિન-મહરમ ગણાવીને એમને ‘પારકી’ અને ‘લગ્નને લાયક’ (લગ્ન કરી શકાય એવી) ગણાવી હતી. કાર્યક્રમમાં ઘણા બધા પત્રકારો હાજર હતા. સ્થાનિક ન્યૂઝ ચેનલોએ આ ઘટનાએ વિવાદ સર્જાયો છે.
પાકિસ્તાનીઓને ઝાકિર નાઈકનું વર્તન પસંદ ન આવ્યુ
ઝાકિર નાઈકનું આ પ્રકારનું વર્તન પાકિસ્તાનીઓને પસંદ ન આવી. ઝાકિરનાં આ વર્તન પર પાકિસ્તાનના રાજકીય ટીકાકાર કમર ચીમાએ તીખી પ્રતિક્રિયા આપી છે. કમરે ઝાકીરની આ કાર્યવાહીને શરમજનક ગણાવી છે.
‘પહેલા મને એ કહો કે તમે ઝાકિર નાઈકને કેમ બોલાવ્યા?’
પોતાના યુટ્યુબ પર વીડિયો શેર કરતા કમર ચીમાએ કહ્યું, ‘હું પાકિસ્તાન સરકાર પાસેથી જાણવા માંગુ છું કે ઝાકિર નાઈકને કઈ ક્ષમતામાં બોલાવવામાં આવ્યો છે. પાકિસ્તાનના નેતાઓ તેને કેમ મળી રહ્યા છે? તો પછી ઝાકીરને બાળકો વચ્ચે કેમ લેવામાં આવ્યો? શું ઝાકિર એક વૈજ્ઞાનિક છે, તે વિદ્યાર્થીઓની વચ્ચે કોણ બોલશે અથવા તેની પાસે અવકાશ તકનીકમાં કોઈ નિપુણતા છે, જેનાથી આપણા બાળકોને ફાયદો થશે.
ચીમાએ વધુમાં કહ્યું કે, ઝાકિર મક્કા કે મદીનાની મસ્જિદના ઈમામ નથી કે સામાન્ય લોકો તેમના માટે સન્માન કરે, તે ભારતના રહેવાસી છે અને હાલ મલેશિયામાં રહે છે. પાકિસ્તાનીઓને તેમની શું પડી છે? શા માટે અમારી સરકારના લોકો તેને એવી રીતે લઈ જાય છે કે જાણે તે કોઈ દેશના રાષ્ટ્રપતિ હોય અને પાકિસ્તાન સરકારે તેની સાથે કોઈ મોટા કરાર કરવાના હોય?
‘છોકરીઓના મનમાં ઝાકિરની શું ઈમેજ ઊભી થશે?’
કમર ચીમાએ કહ્યું, ‘જે છોકરીઓને ઝાકિર નાઈક એવું કહીને સ્ટેજ છોડીને ગયો હતો કે તે એવોર્ડ નહીં આપે તે 15 વર્ષથી ઓછી ઉંમરની છોકરીઓ હતી. આ છોકરીઓ ચોંકી ગઈ, તેઓ સમજી શક્યા નહીં કે શું થઈ રહ્યું છે. તે વ્યક્તિએ પાકિસ્તાનની મહિલાઓનું સીધું અપમાન કર્યું છે. આ યુવતીઓના દિમાગમાં ઝાકીરની ઈમેજ ખૂબ જ હલ્કી થઈ જશે. પાકિસ્તાન સરકારે આ વ્યક્તિને આમંત્રણ આપીને એક રીતે અમને શરમજનક બનાવી છે.
હુસૈન હક્કાની જેવા પાકિસ્તાનના વરિષ્ઠ રાજદ્વારીઓના નામ પણ એવા અગ્રણી લોકોમાં સામેલ છે જેમણે ઝાકિર નાઈકને આમંત્રણ આપવાના પાકિસ્તાન સરકારના નિર્ણયની ટીકા કરી હતી. હક્કીનીએ કહ્યું છે કે ઝાકિર નાઈકને આમંત્રિત કરીને પાકિસ્તાને તેની અસહિષ્ણુ અને કટ્ટરવાદી છબી મજબૂત કરી છે, તેને આમંત્રણ આપવાની કોઈ જરૂર નથી.
કટ્ટરપંથી ઈસ્લામિક ઉપદેશક ઝાકિર નાઈક કે જેઓ ભારતમાં ઘણા ગંભીર આરોપોનો સામનો કરી રહ્યા છે અને તેને ભાગેડુ જાહેર કરવામાં આવ્યો છે તે હાલમાં પાકિસ્તાનમાં છે. ઝાકિર 2016માં ધરપકડથી બચવા માટે ભારતથી ભાગી ગયો હતો જ્યારે અનેક કેસ નોંધાયા હતા. તે ઘણા સમયથી મલેશિયામાં રહે છે.
