ખુલ્લેઆમ 20થી 25 લોકોના ટોળાએ આતંક મચાવ્યો હતો
અમદાવાદના ચાંદલોડિયામાં શિવમ આર્કેડમાં ફ્લેટમાં દારૂની મહેફીલ માણ્યા બાદ અસમાજીક તત્વોએ આતંક મચાવ્યો હતો. દારૂ પીધેલા શખ્સોને સિક્યુરિટીએ રોકતા બબાલ કરી હતી. આ શખ્સોને સિક્યુરિટી અને ફલેટના કમિટી મેમ્બરોએ રોકતા મામલો બિચક્યો હતો. શિવમ આર્કેડમાં નશો કરેલા શખ્સોને રોકતા આ શખ્સોએ અન્ય વ્યક્તિઓને ફોન કરી બોલાવ્યા હતા. થોડા જ સમયમાં 25-30 શખ્સો તલવાર અને દંડા વડે ફ્લેટ પર આવી હુમલો કર્યો. ત્યારે બાદ લોકોમાં ભારે ભયનો માહોલ જોવા મળ્યો હતો.
આ સમગ્ર મામલે ફ્લેટના ચેરમેને પોલીસ ફરીયાદ નોંધાવતા પોલીસનો કાફલો ઘટના સ્થળે પહોંચ્યો હતો. આ મામલે પોલીસે પાંચ આરોપીની ધરપકડ કરી છે. આરોપીઓને લઈને ક્રાઇમ બ્રાન્ચ શિવમ આર્કેડ પર પહોંચી સ્થળ તપાસ કરી હતી અને આરોપીઓની પરેડ કરાવી હતી. આ વિસ્તારમાં આરોપીઓનો ખોફ ઘટાડવા પોલીસ દ્વારા કવાયત હાથ ધરવામાં આવી હતી. સોલા પોલીસ મથકમાં ગુનો નોંધાયા બાદ ક્રાઇમ બ્રાન્ચમાં તપાસ સોંપાઈ છે.
આ ઘટનામાં કૂલ 11 લોકો સામે સોલા પોલીસ સ્ટેશનમાં ફરિયાદ નોંધવામાં આવી છે જેમા રવિ ઠાકોર, અર્જુન ઠાકોર, પરાગ ઠાકોર, ઉત્સવ ઠાકોર અને મોન્ટુ ઠાકોરની ધરપકડ કરી લેવાઈ છે. તમામ 11 લોકો સામે હત્યાનો પ્રયાસ, રાયોટિંગ, આર્મ્સ એક્ટ સહિતની કલમો હેઠળ ફરિયાદ નોંધાઈ છે.
બીજી તરફ પોલીસ તપાસમાં સામે આવ્યું છે કે, શિવમ આર્કેડ સોસાયટીના 205 નંબરના ફ્લેટમાંથી દારૂનો જથ્થો મળી આવ્યો છે. આ ફ્લેટમાં 25થી વધુ ખાલી દારુની પેટીઓ મળી છે
સૂત્રોના જણાવ્યાનુસાર, ચાણક્યપુરીમાં બનેલી ઘટનાને લઈને ગૃહ રાજ્યમંત્રી હર્ષ સંઘવીએ અમદાવાદ પોલીસ કમિશનર અને શહેર પોલીસને કેટલાક સવાલ કર્યા છે. સોસાયટીના લોકોએ 100 નંબર પર ફોન કર્યો હતો છતા પોલીસ અડધો કલાક સુધીમાં કેમ ઘટના સ્થળે ન પહોંચી? સમગ્ર ઘટના મામલે કાર્યવાહી કરવામાં પોલીસ કેમ નિષ્ફળ રહી? વહેલી તકે મામલા પર કાબુ કેમ ન મેળવાયો?
આ ઘટનાને અંગે હર્ષ સંઘવીએ એ પણ સુચના આપી છે કે દોષિતો સામે કડક કાર્યવાહી કરો, ઘટનામા કાંઈ કાચુ ન કપાય તેનું ધ્યાન રાખવું. આ ઉપરાંત ઘટનાને લઈને લોકોમાં જે ડરનો માહોલ ફેલાયો છે તેને દૂર કરવાના પ્રયાસ કરવાની પણ સૂચના આપી છે.
ખુલ્લેઆમ 20થી 25 લોકોના ટોળાએ આતંક મચાવ્યો હતો
ઉલ્લેખનીય છે કે, ગત રાત્રિએ અમદાવાદના ચાણક્યપુરીમાં અસામાજિક તત્વો બેફામ બનીને આતંક મચાવ્યો હતો. નોંધનીય છે કે, શિવમ આર્કેડમાં દારૂ પીધેલ હાલતમાં શખ્સે આતંક મચાવ્યો હતો. શખ્સ નશામાં હોવાથી સ્થાનિકોએ પકડતા હોબાળો મચાવ્યો હતો. શિવમ આર્કેડમાં અસામાજિક તત્વો ઘમાલ મચાવતા સિક્યુરિટીએ રોકતા બબાલ કરી હતી અને હુમલો કર્યો હતો. 20 થી 25 લોકોના ટોળાએ ખુલ્લેઆમ આતંક મચાવ્યો હતો. પોલીસ દ્વારા તે આરોપીઓ સામે ગુનો દાખલ કરવામાં આવ્યો છે.
