મહારાષ્ટ્રમાં ભારે વરસાદને કારણે પીએમ મોદીની પુણેની મુલાકાત રદ્દ કરવામાં આવી છે. મેટ્રો ટ્રેન સહિત અનેક પ્રોજેક્ટનું લોકાર્પણ મોકૂફ
મહારાષ્ટ્રમાં સતત પડી રહેલા ભારે વરસાદને કારણે વડાપ્રધાન નરેન્દ્ર મોદીની પૂણેની મુલાકાત રદ કરવામાં આવી છે. ગુરુવારે, પીએમ મોદી પુણે મેટ્રો ટ્રેનનું ઉદ્ઘાટન કરવાના હતા અને 22,600 કરોડ રૂપિયાના પ્રોજેક્ટનો શિલાન્યાસ કરવાના હતા. જો કે, ભારે વરસાદને જોતા પીએમ મોદીની મુલાકાત રદ કરવાનો નિર્ણય લેવામાં આવ્યો હતો. મહારાષ્ટ્રના અનેક શહેરોમાં પાણી ભરાવાને કારણે સામાન્ય જનજીવન અસ્તવ્યસ્ત થઈ ગયું છે.
ભારતીય હવામાન વિભાગ (IMD) એ પુણે જિલ્લા માટે ઓરેન્જ એલર્ટ જાહેર કર્યું છે. નાગરિકોને કોઈપણ જરૂરિયાત વગર ઘરની બહાર ન નીકળવા અને સાવચેત રહેવા અપીલ કરવામાં આવી છે.
PM મોદીની પુણે મુલાકાત મોકૂફ
PM મોદી ગુરુવારે પુણે મેટ્રોના નવા કોરિડોરનું ઉદ્ઘાટન કરવાના હતા. જો કે, ભારે વરસાદના કારણે કાર્યક્રમ રદ કરવો પડ્યો હતો. પુણેમાં બુધવારથી મુશળધાર વરસાદ પડી રહ્યો છે. જોકે, શહેરમાં વડાપ્રધાનના સ્વાગતની તૈયારીઓ ચાલી રહી હતી અને નાયબ મુખ્યમંત્રી અજિત પવારે એસપી કોલેજના મેદાનમાં વ્યવસ્થા કરી હતી. પરંતુ સભા સ્થળે ભારે જળબંબાકાર અને કાદવને કારણે પીએમ મોદી ત્યાં જાહેરસભા કરી શકશે નહીં.
હવામાન વિભાગ દ્વારા સાવચેત રહેવા અપીલ
ભારે વરસાદને કારણે પુણે અને પિંપરી ચિંચવડમાં તમામ શાળા-કોલેજો બંધ રાખવાનો નિર્ણય લેવામાં આવ્યો છે. પોલીસે લોકોને સતર્ક રહેવા અને હવામાન વિભાગ દ્વારા જારી કરાયેલી ચેતવણીને ગંભીરતાથી લેવા અપીલ કરી છે. વરસાદના કારણે રેલ સેવાને પણ અસર થઈ છે. મુંબઈની લોકલ ટ્રેન મોડી ચાલી રહી છે. પુણેથી ઉપડતી અને પુણે પહોંચતી ઘણી ટ્રેનો નિર્ધારિત સમય કરતા મોડી ચાલી રહી છે.
અનેક પ્રોજેક્ટનો શિલાન્યાસ કરવાના હતા
પીએમ મોદીની પુણે મુલાકાત ગુરુવારે પ્રસ્તાવિત કરવામાં આવી હતી. પીએમ મોદી પુણે મેટ્રો ટ્રેનનું લોકાર્પણ કરવાના હતા. આ સિવાય વડાપ્રધાન 22,600 કરોડ રૂપિયાના પ્રોજેક્ટનો શિલાન્યાસ કરવાના હતા. આ પ્રોજેક્ટ્સમાં ઊર્જા, વાહનવ્યવહાર અને વૈજ્ઞાનિક સંશોધન માટે ઉચ્ચ પ્રદર્શન કમ્પ્યુટિંગ સિસ્ટમ્સ જેવા મહત્વના પ્રોજેક્ટ્સનો સમાવેશ થાય છે. પરંતુ ભારે વરસાદને કારણે પીએમ મોદીએ પ્રવાસ કેન્સલ કરવો પડ્યો હતો.
વડાપ્રધાન નેશનલ સુપર કોમ્પ્યુટિંગ મિશન (NSM) હેઠળ ત્રણ ‘પરમ રુદ્ર’ સુપર કોમ્પ્યુટર રાષ્ટ્રને સમર્પિત કરવાના હતા. આ સુપર કોમ્પ્યુટર્સ રૂ. 130 કરોડના ખર્ચે વિકસાવવામાં આવ્યા છે અને તેને પુણે, દિલ્હી અને કોલકાતામાં તૈનાત કરવામાં આવ્યા છે. આ સાથે, વડાપ્રધાન હવામાન અને આબોહવા સંશોધન માટે હાઈ પરફોર્મન્સ કમ્પ્યુટિંગ (HPC) સિસ્ટમનું પણ ઉદ્ઘાટન કરવાના હતા.
પ્રોજેક્ટના ઉદ્ઘાટનની નવી તારીખ જાહેર કરવામાં આવી નથી
વડાપ્રધાન પેટ્રોલિયમ અને કુદરતી ગેસ ક્ષેત્રે રૂ. 10,400 કરોડની વિવિધ યોજનાઓ પણ લોન્ચ કરવાના હતા. આ યોજનાઓનો ઉદ્દેશ્ય કેબ ડ્રાઇવરો માટે સ્વચ્છ ઉર્જા, સલામત અને ટકાઉ વાહનવ્યવહાર અને વધુ સારી સુવિધા પ્રદાન કરવાનો છે. જો કે ભારે વરસાદને કારણે આ તમામ કાર્યક્રમો હવે મોકૂફ રાખવામાં આવ્યા છે. આ તમામ પ્રોજેક્ટના ઉદ્ઘાટનની નવી તારીખો હજુ જાહેર કરવામાં આવી નથી.
