પીએમ નરેન્દ્ર મોદી મહારાષ્ટ્રીયન લૂકમાં CJI ડીવાય ચંદ્રચૂડ અને તેમનાં પત્ની સાથે ભગવાન ગણેશની આરતી કરતા અને પૂજા કરતા જોવા મળ્યા, વડાપ્રધાને પૂજા સમયે પારંપરિક મહારાષ્ટ્રીય ટોપી પહેરી
કેટલાક લોકો જસ્ટિસ ચંદ્રચૂડ અને મોદીના મળવાને લોકતંત્ર માટે જોખમ માની રહ્યા છે
વડાપ્રધાન નરેન્દ્ર મોદી બુધવારે નવી દિલ્હી સ્થિત ભારતના ચીફ જસ્ટિસ ડીવાય ચંદ્રચૂડના ઘરે ગણપતિ પૂજા સમારોહમાં સામેલ થયા, વડાપ્રધાન નરેન્દ્ર મોદીએ પોતે જ આ અંગે જાણકારી પોતાના સોશિયલ સાઇટ X પર શેર કરી. આ દરમિયાન પીએમ નરેન્દ્ર મોદી CJI ડીવાય ચંદ્રચૂડ અને તેમનાં પત્ની સાથે ભગવાન ગણેશની આરતી કરતા અને પૂજા કરતા જોવા મળ્યા. વડાપ્રધાને પૂજા સમયે પારંપરિક મહારાષ્ટ્રીય ટોપી પહેરી હતી. જોકે ગણેશ પૂજા સૌથી વધારે પ્રખ્યાત મહારાષ્ટ્રમાં છે, એટલે સ્વાભાવિક છે કે પીએમ મોદીએ મહારાષ્ટ્રીય ટોપીને મહત્ત્વ આપ્યું હશે.
પીએમ મોદીએ એક કાંકરે અનેક પક્ષીઓના શિકાર કર્યા છે. મોદીએ મરાઠી ટોપી પહેરીને મરાઠાઓના સ્વાભિમાનનું સન્માન કર્યું છે. સ્વાભાવિક છે કે વિરોધીઓ નારાજ થશે.
પીએમ મોદી દ્વારા સુપ્રીમ કોર્ટના ચીફ જસ્ટિસના ઘરે જઈને પૂજામાં ભાગ લેવા પર લોકો અલગ-અલગ રીતે પ્રતિક્રિયા આપી રહ્યા છે. સુપ્રીમ કોર્ટના વકીલ પ્રશાંત ભૂષણ તેમજ શિવસેના (ઉદ્ધવ ઠાકરે) નેતા સંજય રાઉતે ટ્વીટ કરીને જસ્ટિસ ચંદ્રચૂડ અને મોદીના મળવાને લોકતંત્ર માટે જોખમ માની રહ્યા છે. તો અમુક લોકો આ મુલાકાતને સારી માની રહ્યા છે.
વડાપ્રધાન નરેન્દ્ર મોદીના કટ્ટર વિરોધી સુપ્રીમ કોર્ટના વકીલ પ્રશાંત ભૂષણે ટ્વીટ કર્યું હતું કે ન્યાયાધીશ દ્વારા આચારસંહિતાનું ઉલ્લંઘન એવી પરિસ્થિતિને પ્રતિબિંબિત કરે છે જેમાં ન્યાયાધીશ તેમના કાર્યાલયની ગરિમા મુજબ પર્યાપ્ત અંતર જાળવવામાં નિષ્ફળ રહ્યા છે. આનો અર્થ એ છે કે ન્યાયાધીશના કોઈપણ કાર્ય અથવા અવગણનાથી તેમના ઉચ્ચ પદની ગરિમા અને જાહેર માન્યતાને અસર થઈ છે.
શિવસેના (ઉદ્ધવ ઠાકરે) નેતા સંજય રાઉત પણ ચંદ્રચૂડ સાથે મોદીની મુલાકાતથી નારાજ છે. રાઉતે શંકા વ્યક્ત કરી હતી કે સુપ્રીમ કોર્ટના ચીફ જસ્ટિસ ડીવાય ચંદ્રચૂડ હેઠળ સેનાના ઉદ્ધવ ઠાકરે જૂથને ન્યાય મળશે એટલે જ તેમને આ કેસમાંથી પોતાને દૂર કરવાની સલાહ પણ આપી હતી.
યુઝર્સે કહ્યું- મહારાષ્ટ્રમાં ચૂંટણી નજીક છે
પીએમ મોદી દ્વારા સુપ્રીમ કોર્ટના ચીફ જસ્ટિસના ઘરે જઈને પૂજામાં ભાગ લેવા પર લોકો અલગ-અલગ રીતે પ્રતિક્રિયા આપી રહ્યા છે. નેતાજી નામના યુઝરે લખ્યું- જો કેમેરો તેમની તરફ રાખ્યો હોત તો બધાને ખબર પડી હોત કે તેઓ વાત કરી રહ્યા છે. શુભમ નામના યૂઝરે લખ્યું છે- લાગે છે કે એક મોટો શ્રીગણેશ થવા જઈ રહ્યો છે.
અર્ચના નામના યુઝરે તો ત્યાં સુધી લખ્યું કે તે મહારાષ્ટ્રમાં જેવો ડ્રેસ પહેરવામાં આવે છે તેવી જ પહેર્યો છે. જજ સાહેબ પણ મહારાષ્ટ્રના છે. બાકી, સંયોગ છે કે મહારાષ્ટ્રમાં થોડા મહિનામાં ચૂંટણી યોજાશે.
બંધારણમાં ક્યાંય એવું નથી કહેવાયું કે કારોબારી અને ન્યાયતંત્ર એકબીજાને મળી શકે નહીં.
જે લોકો મોદી અને ચંદ્રચૂડની મુલાકાતને ભારતીય લોકશાહી માટે ખતરો માને છે તેમને બંધારણમાં શું લખ્યું છે એની ખબર નથી. બંધારણમાં ક્યાંય એવું નથી કહેવાયું કે કારોબારી અને ન્યાયતંત્ર એકબીજાને મળી શકે નહીં. વાસ્તવમાં કોઈપણ સ્વસ્થ લોકશાહી માટે, સત્તાનું વિભાજન અને સત્તાનો સહકાર બંનેને અલગ દૃષ્ટિકોણથી જોવાની જરૂર છે. લોકશાહીના આ બે સ્તંભો વચ્ચે એટલું અંતર ન હોવું જોઈએ કે તેમની વચ્ચે દીવાલ બનાવવામાં આવે. ભારતીય લોકોને સાચો ન્યાય ત્યારે જ મળશે જ્યારે બંને દેશની ભલાઈ માટે સાથે મળીને કામ કરશે.
જો આ બંને સંતાઈને મળ્યા હોત અને તેમની મીટિંગ છૂપાવી હોત તો લોકશાહીને ખતરો સમજાઈ ગયો હોત.
બીજી એક વાત છે. જો આ બંને સંતાઈને મળ્યા હોત અને તેમની મીટિંગ છૂપાવી હોત તો લોકશાહીને ખતરો સમજાઈ ગયો હોત. પરંતુ અહીં પીએમ મોદી પોતે ટ્વીટ કરીને માહિતી આપે છે. ફોટા અને વીડિયો પણ ટ્વિટ કરે છે. સમજવા જેવી વાત એ છે કે જો બંને ઇચ્છતા હોત તો મુલાકાત છુપી રીતે થઇ શકી હોત અને કોઈને ખબર પણ ન પડી હોત.
CJIએ મોદી સરકાર વિરુદ્ધ ઘણા મહત્ત્વપૂર્ણ ચુકાદા આપ્યા છે એ પણ લોકોએ ધ્યાનમાં લેવા જોઈએ.
CJI ચંદ્રચુડે મોદી સરકાર વિરુદ્ધ ઘણા મહત્ત્વપૂર્ણ ચુકાદા આપ્યા છે જે ન્યાયિક સ્વતંત્રતા અને સરકારી નીતિઓ પરના તેમના મતને પ્રતિબિંબિત કરે છે.
ગે લગ્ન કેસ: CJI ચંદ્રચુડે ગે લગ્ન કેસમાં મહત્ત્વપૂર્ણ અવલોકનો કર્યા હતા, જેમાં તેમણે સ્પષ્ટતા કરી હતી કે વ્યક્તિગત દત્તક લેવાનો અધિકાર વૈવાહિક સ્થિતિથી પ્રભાવિત થતો નથી. તેમણે એવી પણ ટિપ્પણી કરી હતી કે સમલૈંગિકતા અને વિલક્ષણ અધિકારો એ શહેરી-ઉચ્ચ વર્ગના ખ્યાલો નથી, જે કેન્દ્ર સરકારના દૃષ્ટિકોણથી અલગ છે.
મહારાષ્ટ્રના રાજ્યપાલનો કેસ: CJI ચંદ્રચુડ રાજ્યમાં સરકારની રચના અંગે મહારાષ્ટ્રના રાજ્યપાલની ટિપ્પણીથી અસંમત હતા. તેમણે ભૂતપૂર્વ ગવર્નર ભગતસિંહ કોશ્યારીના ફ્લોર ટેસ્ટ બોલાવવાના નિર્ણયને દોષિત ઠરાવ્યો હતો, જોકે, ઉદ્ધવ ઠાકરેને મુખ્ય પ્રધાન તરીકે પુનઃસ્થાપિત કરવાનો ઇનકાર કર્યો હતો.
ન્યાયિક નિમણૂંકો: CJI ચંદ્રચુડે ઉચ્ચ ન્યાયતંત્રમાં નિમણૂકો માટે સરકાર દ્વારા નામ નકારવાની પ્રથાની ટીકા કરી હતી. તેમણે સુનિશ્ચિત કર્યું કે કોલેજિયમની ભલામણો સરકાર દ્વારા અનિશ્ચિત સમય માટે રોકી રાખવામાં આવી ન હતી અને પસંદ કરાયેલા ન્યાયાધીશોના નામોને ઝડપથી મંજૂર કરવામાં આવ્યા હતા. CJI ચંદ્રચુડની આગેવાની હેઠળની બેન્ચે અદાણી ગ્રુપ પર હિંડનબર્ગ રિસર્ચ રિપોર્ટ અંગે કેન્દ્ર સરકાર દ્વારા સીલબંધ કવર હેઠળ આપવામાં આવેલા સૂચનને ફગાવી દીધું હતું.
ઈલેક્ટોરલ બોન્ડ કેસમાં સુપ્રીમ કોર્ટના નિર્ણયને કારણે સરકારને ઘણી શરમનો સામનો કરવો પડ્યો હતો. મુખ્ય ન્યાયાધીશ ડીવાય ચંદ્રચુડની આગેવાની હેઠળની પાંચ ન્યાયાધીશોની બંધારણીય બેન્ચે સર્વસંમતિથી કહ્યું હતું કે કેન્દ્ર સરકારની 2018ની ચૂંટણી બોન્ડ યોજના ગેરબંધારણીય છે. તેમણે જોયું કે આ યોજના બંધારણની કલમ 19(1)(a) હેઠળ માહિતીના અધિકારનું ઉલ્લંઘન કરે છે. વધુમાં, તેમણે કહ્યું કે આ યોજના કલમ 14 હેઠળ મુક્ત અને નિષ્પક્ષ ચૂંટણીના સિદ્ધાંતોનું ઉલ્લંઘન કરે છે.
