T-20 ઇન્ટરનેશનલમાં એક નવો વર્લ્ડ રેકોર્ડ નોંધાયો છે. અત્યાર સુધી T20 ઈન્ટરનેશનલની એક ઓવરમાં માત્ર 36 રન જ બન્યા હતા. હવે આ આંકડો 39 રન પર પહોંચી ગયો છે. સમોઆના બેટર ડેરિયસ વિસર T-20 ઇન્ટરનેશનલમાં 1 ઓવરમાં સૌથી વધુ રન બનાવનાર બેટર બની ગયો છે. ડેરિયસ વિસરે એક ઓવરમાં 39 રન બનાવીને યુવરાજ સિંહ, કિરોન પોલાર્ડ, નિકોલસ પૂરન, દીપેન્દ્ર સિંહ એરી અને રોહિત શર્મા/રિંકુ સિંહ)નો રેકોર્ડ તોડ્યો છે. આ તમામ બેટર્સે 1 ઓવરમાં 36 રન બનાવ્યા હતા.
મંગળવાર 20 ઓગસ્ટના રોજ મેન્સ T20 વર્લ્ડકપ પેટા-રિજનલ ઇસ્ટ એશિયા-પેસિફિક ક્વૉલિફાયર A ઇવેન્ટની મેચમાં સમોઆના બેટર ડેરિયસ વિસરે વાનુઆતનાં બોલર સીમર નલિન નિપિકોની એક જ ઓવરમાં 39 રન ફટકાર્યા હતા. ડેરિયસ વિસરે મેચની 15મી ઓવરમાં 6 સિક્સર ફટકારી હતી. આ સાથે જ ડેરિયસ વિસરે 1 ઓવરમાં 6 સિક્સર ફટકારવાની સિદ્ધિ પણ હાંસલ કરી હતી.
વીડિયો જોવા નીચે આપેલ લિંક ઉપર ક્લીક કરો.
https://x.com/SportzOnX/status/1825752189710774526
1 ઓવરમાં 39 રન, 6,6,6,1,6,0,1,7,6
ડેરિયસ વિસરે સીમર નલિન નિપિકોની ઓવરના પહેલા ત્રણ બોલમાં 3 સિક્સર ફટકારી હતી. જ્યારે ચોથો બોલ નો-બોલ હતો, જેથી 1 રન બન્યો હતો. ત્યાર પછીના બોલ પર વિસરે વધુ એક સિક્સર ફટકારી. આ પછી ઓવરનો પાંચમો બોલ ડોટ હતો. આ પછી છઠ્ઠો બોલ નૉ બૉલ હતો, જેના પર એક રન આવ્યો. અને તેના પછીનો બોલ પણ નો-બોલ હતો, જેના પર સિક્સર ફટકારવામાં આવી હતી. ત્યાર બાદ છેલ્લા ફ્રી હિટ બૉલ પર વિસરે ગગનચુંબી સિક્સર ફટકારી હતી. આમ વિસરે એક જ ઓવરમાં કુલ 39 રન બનાવ્યા હતા.
આ મેચમાં ડેરિયસ વિસર ચોથા નંબર પર બેટિંગ કરવા આવ્યો હતો. તેણે શરૂઆતથી જ આક્રમક બેટિંગ કરી અને તોફાની સદી ફટકારી. વિસરે માત્ર 62 બોલમાં 132 રનની શાનદાર ઇનિંગ રમી હતી. આ દરમિયાન તેના બેટમાંથી 5 ચોગ્ગા અને 14 છગ્ગા આવ્યા હતા. તે સમોઆ માટે સદી ફટકારનાર પ્રથમ બેટર પણ બની ગયો છે.
ડેરિયસ વિસેરની તોફાની ઈનિંગની મદદથી સમોઆની ટીમે નિર્ધારિત 20 ઓવરમાં 174 રન બનાવ્યા હતા. ટાર્ગેટને ચેઝ કરવા ઊતરેલી વાનુઆતુની ટીમ 9 વિકેટ ગુમાવીને 164 રન જ બનાવી શકી હતી. વાનુઆતુ માટે, પ્રથમ દાવમાં 6 છગ્ગા અપાવનાર સીમર નલિન નિપિકોએ સૌથી વધુ 73 રનની ઇનિંગ્સ રમી હતી. પરંતુ વનુઆતુની ટીમ 20 ઓવરમાં 164/9 રન જ બનાવી શકી હતી અને 10 રનથી વાનુઆતની હાર થઈ હતી.
ડેરિયસ વિસરે એક ઓવરમાં 6 સિક્સ ફટકારનાર ભારતીય બેટરે યુવરાજ સિંહનાં રેકોર્ડની પણ બરાબરી કરી લીધી છે. વર્ષ 2007માં યુવરાજે ઇંગ્લેન્ડના સ્ટુઅર્ટ બ્રોડ સામે 6 બોલમાં 6 સિક્સર ફટકારી હતી. વિસર T-20 ઈન્ટરનેશનલ મેચની એક ઓવરમાં 6 સિક્સર મારનાર ચોથો બેટર બની ગયો છે. તેની પહેલાં યુવરાજ સિંહ સિવાય કાઇરન પોલાર્ડ અને નેપાળના દીપેન્દ્ર સિંહ એરીએ એક ઓવરમાં 6 સિક્સર ફટકારી છે.
| પ્લેયર | રન | વર્ષ |
|---|---|---|
| ડેરિયસ વિસર – સમોઆ | 39 | 2024 |
| યુવરાજ સિંહ – ભારત | 36 | 2007 |
| કાઈરન પોલાર્ડ – વેસ્ટ ઇન્ડિઝ | 36 | 2021 |
| નિકોલસ પૂરન – વેસ્ટ ઇન્ડિઝ | 36 | 2024 |
| દિપેન્દ્ર સિંહ એરી – નેપાળ | 36 | 2024 |
