જમ્મુ-કાશ્મીરમાંથી કલમ 370 હટાવ્યા બાદ રેકોર્ડ બ્રેક મતદાન
લોકસભા ચૂંટણીના પાંચમા તબક્કાનું મતદાન પૂર્ણ થઈ ગયું છે. 8 રાજ્યોની 49 બેઠકો પર લગભગ 57.47 ટકા મતદાન નોંધાયું છે. જેમાં પશ્ચિમ બંગાળમાં સૌથી વધુ 74.65 ટકા જ્યારે મહારાષ્ટ્રમાં સૌથી ઓછું મતદાન થયું હતું. આ તબક્કામાં ઘણી બેઠકો પર ઐતિહાસિક મતદાન પણ નોંધાયું છે. ચૂંટણીના પાંચમા તબક્કામાં બારામુલ્લા લોકસભા સીટે મતદાનના મામલે 40 વર્ષ જૂનો રેકોર્ડ તોડ્યો છે. આ પહેલા ચૂંટણીના ચોથા તબક્કામાં શ્રીનગર સીટ પર પણ બમ્પર વોટિંગ થયું હતું.
વર્ષ 2019માં જમ્મુ-કાશ્મીરમાંથી કલમ 370 હટાવ્યા બાદ આ પહેલી લોકસભા ચૂંટણી છે. ઘાટીની બે સીટો પર અત્યાર સુધીમાં બમ્પર વોટિંગ જોવા મળ્યું છે. બારામુલ્લા, કુપવાડા, બાંદીપોરા અને બડગામ જિલ્લામાં સાંજે 5 વાગ્યા સુધી 54.21 ટકા મતદાન નોંધાયું હતું. આ વખતે બારામુલા સંસદીય ક્ષેત્રમાં 2103 મતદાન મથકો બનાવવામાં આવ્યા હતા. બારામુલા સીટ પરથી 22 ઉમેદવારો મેદાનમાં છે. નેશનલ કોન્ફરન્સના ઉપાધ્યક્ષ ઓમર અબ્દુલ્લા ઉપરાંત પીપલ્સ કોન્ફરન્સના પ્રમુખ સજ્જાદ ગની લોન પણ મેદાનમાં છે. શેખ અબ્દુલ રશીદ ઉર્ફે એન્જિનિયર રશીદ પણ અપક્ષ ઉમેદવાર તરીકે ચૂંટણી લડી રહ્યા છે. રાશિદ હાલ જેલમાં છે.
આ તબક્કામાં જમ્મુ-કાશ્મીરની બારામુલા લોકસભા બેઠક પર 40 વર્ષનો રેકોર્ડ તુટ્યો હતો અને 59 ટકા મતદાન થયું હતું. 1984માં આ બેઠક પર 58.84 ટકા મતદાન થયું હતું. આ આંકડાઓ હજુ પણ બદલાઈ શકે છે. કારણ કે સાંજે 7 વાગ્યે મતદાનની ટકાવારી જાહેર કરવામાં આવી ત્યારે કેટલાક મતદાન મથકો પર મતદારોની લાઈનો લાગી હતી.
જ્યારે પાંચમા તબક્કાના મતદાનની વાત કરીએ તો 57.47 ટકા મતદાન નોંધાયું છે. આ સાથે અત્યાર સુધીમાં 25 રાજ્યો અને કેન્દ્રશાસિત પ્રદેશો અને 428 લોકસભા સીટો પર લોકસભાની ચૂંટણી પૂર્ણ થઈ ગઈ છે. હવે માત્ર બે તબક્કાની ચૂંટણી બાકી છે. છઠ્ઠા તબક્કા માટે 25 મેના રોજ અને સાતમા તબક્કા માટે 1 જૂને મતદાન થશે. આ પછી, 4 જૂને દેશને લોકસભા ચૂંટણીના પરિણામો જાહેર કરવામાં આવશે.
2019માં બારામુલ્લા લોકસભા સીટ પર 34.6 ટકા મતદાન થયું હતું, ત્યારબાદ થોડા મહિનાઓ બાદ એટલે કે 7 ઓગસ્ટ 2019ના રોજ કેન્દ્ર સરકારે જમ્મુ અને કાશ્મીરમાંથી કલમ 370 નાબૂદ કરી હતી. આ સાથે જમ્મુ-કાશ્મીર અને લદ્દાખ બે ભાગમાં વહેંચાઈ ગયા. હાલમાં બંને કેન્દ્રશાસિત પ્રદેશો છે. 1989ની લોકસભા ચૂંટણીમાં બારામુલ્લા સીટ પર માત્ર 5.48 ટકા મતદાન નોંધાયું હતું.
