મનોહર લાલ ખટ્ટર કરનાલથી તો નીતિન ગડકરી નાગપુરથી ચૂંટણી લડશે
આગામી કેટલાંક દિવસમાં ચૂંટણી પંચ લોકસભા ચૂંટણીની તારીખની જાહેર કરી શકે છે. તેવામાં લોકસભા ચૂંટણી માટે ભાજપની બીજી યાદી આજે જાહેર કરવામાં આવી છે. આ યાદીમાં 72 ઉમેદવારોનાં નામ છે. ભાજપે બીજી યાદીમાં દિલ્હી, ગુજરાત, હરિયાણા, હિમાચલ પ્રદેશ, કર્ણાટક, મધ્યપ્રદેશ, મહારાષ્ટ્ર, તેલંગણા, ત્રિપુરા, ઉત્તરાખંડના ઉમેદવારો જાહેર કર્યાં છે.
ભાજપે બીજી યાદીમાં 10 રાજ્યોની 72 સીટ પર પોતાના ઉમેદવારોની જાહેરાત કરી છે. જેમાં ગુજરાતમાંથી 7, દિલ્હીમાંથી 2, હરિયાણાના 6, હિમાચલ પ્રદેશના 2, કર્ણાટકમાં 20, મધ્યપ્રદેશના 5, ઉત્તરાખંડના 5, મહારાષ્ટ્રના 20, તેલંગાનાન 6 અને ત્રિપુરાનાં 1 નામ જાહેર કરેલ છે. આ યાદીમાં ઘણા મોટા નામ સામેલ છે. હરિયાણાનાં પૂર્વ મુખ્યમંત્રી મનોહર લાલ ખટ્ટરને કરનાલથી, તો નાગપુરથી નીતિન ગડકરીને ટિકિટ આપવામા આવી છે. અનુરાગ ઠાકુરને હમીરપુરથી મેદાનમાં ઉતારવામાં આવ્યા છે. રાવ ઈન્દ્રજીત સિંહ ગુરુગ્રામથી અને કંવરપાલ ગુર્જર ફરીદાબાદથી ચૂંટણી લડશે. અહીંથી કેન્દ્રીય મંત્રી કૃષ્ણપાલ ગુર્જરની ટિકિટ કાપવામાં આવી છે. કેન્દ્રીય મંત્રી પીયૂષ ગોયલને ઉત્તર મુંબઈથી મેદાનમાં ઉતારવામાં આવ્યા છે.આ સિવાય હર્ષ મલ્હોત્રાને પૂર્વ દિલ્હીથી અને યોગેન્દ્ર ચંદોલિયાને ઉત્તર પશ્ચિમ દિલ્હીથી ચૂંટણી લડવાની ટિકિટ મળી છે.
BJP releases its second list of candidates for the upcoming Lok Sabha elections pic.twitter.com/bpTvxfMkDr
ભાજપે જાહેર કરેલી પહેલી યાદીમાં નીતિન ગડકરીનું નામ ન હતું. પરંતુ હવે બીજી યાદીમાં નીતિન ગડકરીને નાગપુર સીટથી ટિકિટ અપાઈ છે. નોંધનીય છે કે હાલમાં જ શિવસેનાના અધ્યક્ષ ઉદ્ધવ ઠાકરેએ કેન્દ્રીય મંત્રી નીતિન ગડકરીને શિવસેનામાં આવવાની ખુલી ઓફર આપી હતી. તેમની આ રજૂઆત પર ડેપ્યુટી સીએમ દેવેન્દ્ર ફડણવીસે કહ્યું હતું કે- જ્યારે મહારાષ્ટ્રની સીટની ચર્ચા થશે ત્યારે નીતિન ગડકરીનું નામ તેમાં સામેલ હશે.
નોંધનીય છે કે ગત સોમવારે દિલ્હી સ્થિત પાર્ટી મુખ્યાલયમાં ભાજપની કેન્દ્રીય ચૂંટણી સમિતિની બીજી બેઠક થઈ હતી. બેઠકમાં વડાપ્રધાન નરેન્દ્ર મોદી, કેન્દ્રીય ગૃહ મંત્રી અમિત શાહ અને ભાજપના રાષ્ટ્રીય અધ્યક્ષ જેપી નડ્ડા સહિત પ્રમુખ નેતાઓએ ભાગ લીધો અને બેઠકમાં મધ્યપ્રદેશ, મહારાષ્ટ્ર, ગુજરાત, કર્ણાટક, બિહાર, હિમાચલ પ્રદેશ અને તેલંગાનાના ઉમેદવારો પર વિચાર વિમર્શ કરાયો હતો.
સૂત્રો દ્વારા જાણવા મળેલ છે કે આગામી કેટલાંક દિવસમાં ચૂંટણી પંચ લોકસભા ચૂંટણીની તારીખની જાહેર કરી શકે છે. એપ્રિલ અને મેમાં કેટલાંક તબક્કામાં મતદાન થઈ શકે છે, જ્યારે પરિણામની જાહેરાત મેના અંત સુધીમાં આવી શકે છે. ગત 2019 લોકસભા ચૂંટણીમાં સાત તબક્કામાં વોટિંગ થયું હતું.
ભાજપે બીજી યાદીમાં ગુજરાતના 7 ઉમેદવારો જાહેર કર્યા છે. જેમાં 2 ચહેરા વડોદરાથી રંજન ભટ્ટ અને અમદાવાદ પૂર્વથી હસમુખ પટેલને રિપીટ કર્યા છે. જ્યારે 5 સિટીંગ સાંસદોના પત્તા કાપ્યા છે. 26માંથી 22 નામ જાહેર કરાયા છે અને 4 નામની જાહેરાત કરવાની હજુ બાકી છે.
