અગ્નિ-5 એ સૌથી શક્તિશાળી મિસાઈલ છે. અગ્નિ-5 મિસાઈલની રેન્જ 3500 થી 5000 કિમી છે
આ મિસાઈલ 3500-5000 કિમી સુધીના અંતરે બેઠેલા દુશ્મનોને થોડી જ સેકન્ડમાં ખતમ કરી શકે છે
આજે DRDOના વૈજ્ઞાનિકોએ સ્વદેશી રીતે વિકસિત MIRV ટેક્નોલોજીવાળી અગ્નિ-5 મિસાઈલનું સફળ પરિક્ષણ કર્યું છે. દેશની સુરક્ષા અને પ્રગતિ સાથે જોડાયેલી ઘટનાને લઈને વડાપ્રધાન નરેન્દ્ર મોદીએ DRDOના વૈજ્ઞાનિકોને અભિનંદન પાઠવ્યા છે. વડાપ્રધાન નરેન્દ્ર મોદીએ અભિનંદન પાઠતા સોશિયલ મીડિયા પ્લેટફોર્મ X પર લખ્યું, ” (MIRV) મલ્ટીપલ ઈન્ડિપેન્ડન્ટલી ટાર્ગેટેબલ રી-એન્ટ્રી વ્હીકલ ટેક્નોલોજી સાથે સ્વદેશી રીતે વિકસિત અગ્નિ-5 મિસાઈની આ પ્રથમ ઉડાન છે. મિશન દિવ્યાસ્ત્ર માટે આપણા DRDO વૈજ્ઞાનિકો પર ગર્વ છે.”
ભારત પાસે અત્યારે અગ્નિ શ્રેણીની 1 થી 5 મિસાઈલો છે. આમાંથી કેટલીક ટૂંકી રેન્જની ક્ષમતા ધરાવે છે અને કેટલીક મધ્યમ કક્ષાની રેન્જ ધરાવે છે, પરંતુ અગ્નિ-5 એ સૌથી શક્તિશાળી મિસાઈલ છે. અગ્નિ-5 મિસાઈલની રેન્જ 3500-5000 કિમી છે. આનો અર્થ એ છે કે તે 3500-5000 કિમી સુધીના અંતરે બેઠેલા દુશ્મનોને થોડી જ સેકન્ડમાં ખતમ કરી શકે છે. DRDO પણ આ મિસાઈલોને અદ્યતન ટેકનોલોજી સાથે અપગ્રેડ કરી રહ્યું છે જેથી જ્યારે સમય આવે ત્યારે દુશ્મનોને જડબાતોડ જવાબ આપી શકાય.
અગ્નિ-Vની વિશેષતા
અગ્નિ-5 મિસાઈલ (અગ્નિ-વી)નું વજન 50 હજાર કિલોગ્રામ છે. તે 17.5 મીટર લાંબી છે. તેનો વ્યાસ 2 મીટર એટલે કે 6.7 ફૂટ છે. તેના પર 1500 કિલોગ્રામ વજનનું પરમાણુ હથિયાર લગાવી શકાય છે. આ મિસાઈલમાં ત્રણ સ્ટેજ રોકેટ બૂસ્ટર છે જે ઘન ઈંધણ પર ઉડે છે. તેની ઝડપ અવાજની ગતિ કરતા 24 ગણી વધારે છે. એટલે કે તે એક સેકન્ડમાં 8.16 કિલોમીટરનું અંતર કાપે છે.
અગ્નિ-5 મિસાઈલ (Agni-V) 29,401 કિલોમીટર પ્રતિ કલાકની ઝડપે દુશ્મન પર હુમલો કરે છે. તે રીંગ લેસર ગાયરોસ્કોપ ઇનર્શિયલ નેવિગેશન સિસ્ટમ, જીપીએસ, નેવીઆઈસી સેટેલાઇટ ગાઇડન્સ સિસ્ટમથી સજ્જ છે. અગ્નિ-5 મિસાઈલ ચોકસાઈ સાથે લક્ષ્ય પર હુમલો કરે છે. જો લક્ષ્ય 10 થી 80 મીટર દૂર પણ તેની જગ્યાએથી ખસી જાય તો તેનાથી બચવું મુશ્કેલ છે.
અગ્નિ-5 મિસાઈલની રેન્જ 5500 કિમીથી વધારે
વર્ષ 2022માં પણ ભારતની સૌથી શક્તિશાળી મિસાઈલનું સફળ પરીક્ષણ કરવામાં આવ્યું હતું. ત્યારબાદ તેણે 5500 કિલોમીટરના અંતરે લક્ષ્યને નષ્ટ કર્યું. આ મિસાઈલ DRDO અને ભારત ડાયનેમિક્સ લિમિટેડ (BDL) દ્વારા સંયુક્ત રીતે વિકસાવવામાં આવી છે. મુદ્દો એ નથી કે તેની રેન્જ શું છે, ચીન અને ઘણા દેશોને ડર છે કે તેમનો આખો વિસ્તાર આ મિસાઈલના રડારમાં આવી રહ્યો છે.
અગ્નિ-5 મિસાઈલ (Agni-V ICBM)નું પ્રથમ સફળ પરીક્ષણ 19 એપ્રિલ 2012ના રોજ થયું હતું. તે પછી, 15 સપ્ટેમ્બર 2013, 31 જાન્યુઆરી 2015, 26 ડિસેમ્બર 2016, 18 જાન્યુઆરી 2018, 3 જૂન 2018 અને 10 ડિસેમ્બર 2018 ના રોજ સફળ પરીક્ષણો હાથ ધરવામાં આવ્યા હતા. અગ્નિ-5 મિસાઈલના સાત સફળ પરીક્ષણ કરવામાં આવ્યા છે. આ પરીક્ષણોમાં મિસાઈલનું વિવિધ માપદંડો પર પરીક્ષણ કરવામાં આવ્યું હતું. જેમાં ખુલાસો થયો હતો કે આ મિસાઈલ દુશ્મનને નષ્ટ કરવા માટે એક ઉત્તમ હથિયાર છે.
2007માં પ્રથમ વખત મિસાઈલની યોજના બનાવાઈ હતી
વૈજ્ઞાનિક એમ. નટરાજને સૌપ્રથમવાર 2007માં આ મિસાઈલની યોજના બનાવી હતી. મોબાઈલ લોન્ચરનો ઉપયોગ અગ્નિ-5 મિસાઈલ (અગ્નિ-વી) કરવા માટે થાય છે. તેને ટ્રકમાં ભરીને કોઈપણ જગ્યાએ લઈ જઈ શકાય છે. 50 હજાર કિલોની અગ્નિ-5 મિસાઈલને 200 ગ્રામ કંટ્રોલ અને ગાઈડન્સ સિસ્ટમ દ્વારા નિયંત્રિત કરવામાં આવે છે. તે આ મિસાઈલ પર જ સ્થાપિત છે. તેને ઓન-બોર્ડ કોમ્પ્યુટર આધારિત સિસ્ટમ ઓન ચિપ (SOC) કહેવામાં આવે છે. MIRV ટેક્નોલોજી એટલે કે મિસાઈલના નાક પર બેથી 10 હથિયારો ફીટ કરી શકાય છે. એટલે કે એક જ મિસાઈલ એક સાથે અનેક સો કિલોમીટરમાં ફેલાયેલા 2 થી 10 જુદા જુદા ટાર્ગેટને નિશાન બનાવી શકે છે.
