ગુજરાતમાં બે પ્લાન્ટ અને આસામમાં એક પ્લાન્ટ બનાવવામાં આવશે, 100 દિવસની અંદર પ્લાન્ટમાં બાંધકામ શરૂ કરવામાં આવશે
કેન્દ્રીય કેબિનેટ દ્વારા આજે ચિપ પ્લાન્ટ માટે ત્રણ દરખાસ્તોને મંજૂરી આપવામાં આવી છે. જેમાં ‘ડેવલપમેન્ટ ઓફ સેમિકન્ડક્ટર્સ એન્ડ ડિસ્પ્લે મેન્યુફેક્ચરિંગ ઇકોસિસ્ટમ ઇન ઇન્ડિયા’ હેઠળ ત્રણ પ્લાન્ટની સ્થાપનાને મંજૂરી આપી હતી. જેમાંથી બે ગુજરાતમાં અને એક આસામમાં બનાવવામાં આવશે. આ ત્રણ ચિપ પ્લાન્ટની અંદાજિત કિંમત 1.26 લાખ કરોડ રૂપિયા છે. ત્રણેય પ્લાન્ટ આગામી 100 દિવસની અંદર બાંધકામ શરૂ કરશે.
ખૂબ જ ઓછા સમયમાં ઇન્ડિયા સેમિકન્ડક્ટર મિશને ચાર મોટી સફળતાઓ હાંસલ કરી છે. આ એકમો સાથે ભારતમાં સેમીકન્ડક્ટર ઇકોસિસ્ટમ સ્થાપિત થશે.ચિપ ડિઝાઇનમાં ભારત પાસે પહેલેથી જ ઊંડી ક્ષમતાઓ છે. આ એકમો સાથે, આપણો દેશ ચિપ ફેબ્રિકેશનમાં ક્ષમતાઓ વિકસાવશે.
કેન્દ્રીય IT મંત્રી અશ્વિની વૈષ્ણવે જણાવ્યું હતું કે ટાટાનું સંયુક્ત સાહસ દેશનો પ્રથમ સેમિકન્ડક્ટર ફેબ્રિકેશન પ્લાન્ટનું નિર્માણ કરશે. જેમાં દર મહિને 50 હજાર ચિપ બનાવી શકાશે. ધોલેરામાં માઈક્રોનના સેમિકન્ડક્ટર પ્લાન્ટ બાદ અહીં ફેબ્રિકેશન પ્લાન્ટ બનાવવામાં આવશે. અમેરિકન ચિપ કંપની માઈક્રોન ધોલેરામાં રૂ. 22,516 કરોડના ખર્ચે ચિપ એસેમ્બલી પ્લાન્ટ બનાવી રહી છે.
ત્રણ સેમીકન્ડક્ટર એકમો આ મુજબ છેઃ
- ટાટા ઈલેક્ટ્રોનિક્સ અને તાઈવાનની પાવર ચિપ સેમિકન્ડક્ટર મેન્યુફેક્ચરિંગ કોર્પોરેશન (PSMC) વચ્ચેનું સંયુક્ત સાહસ 91,000 કરોડના રોકાણ સાથે ગુજરાતના ધોલેરામાં ચિપ ફેબ્રિકેશન પ્લાન્ટનું નિર્માણ કરશે. PSMC તાઈવાનમાં 6 ચિપ ફાઉન્ડ્રી ધરાવે છે. જ્યારે ગુજરાતમાં પ્લાન્ટ બનશે ત્યારે તેની દર મહિને 50 હજાર વેફર બનાવવાની ક્ષમતા હશે. આ PSMCનો પ્રથમ સેમિકન્ડક્ટર ફેબ્રિકેશન પ્લાન્ટ પણ છે.
ક્યાં ઉપયોગમાં લેવાશે : 28 એનએમ ટેકનોલોજી સાથે હાઈ પરફોર્મન્સ કમ્પ્યુટ ચિપ્સ ઇલેક્ટ્રિક વાહનો (ઇવી), ટેલિકોમ, સંરક્ષણ, ઓટોમોટિવ, કન્ઝ્યુમર ઇલેક્ટ્રોનિક્સ, ડિસ્પ્લે, પાવર ઇલેક્ટ્રોનિક્સ વગેરે માટે પાવર મેનેજમેન્ટ ચિપ્સ. પાવર મેનેજમેન્ટ ચિપ્સ હાઈ વોલ્ટેજ, હાઈ કરન્ટ એપ્લિકેશન છે. - ટાટા ગ્રુપની ટાટા સેમિકન્ડક્ટર એસેમ્બલી એન્ડ ટેસ્ટ પ્રાઈવેટ લિમિટેડ (TSAT) આસામના મોરીગાંવમાં 27 હજાર કરોડ રૂપિયાના રોકાણ સાથે પ્લાન્ટ બનાવશે. તેની પાસે દરરોજ 4.8 કરોડ ચિપ્સ બનાવવાની ક્ષમતા હશે.
ટેકનોલોજી: ટીએસએટી (TSAT) સેમીકન્ડક્ટર ફ્લિપ ચિપ અને આઇએસઆઇપી (પેકેજમાં ઇન્ટિગ્રેટેડ સિસ્ટમ) ટેકનોલોજી સહિત સ્વદેશી અદ્યતન સેમીકન્ડક્ટર પેકેજિંગ ટેકનોલોજી વિકસાવી રહ્યું છે.
ક્યાં ઉપયોગમાં લેવાશે : ઓટોમોટિવ, ઇલેક્ટ્રિક વાહનો, કન્ઝ્યુમર ઇલેક્ટ્રોનિક્સ, ટેલિકોમ, મોબાઇલ ફોન, વગેરે. - ટાટા ગ્રૂપ ઉપરાંત, સીજી પાવર જાપાનના રેનેસાસ ઈલેક્ટ્રોનિક્સ કોર્પોરેશન અને થાઈલેન્ડની સ્ટાર માઈક્રો ઈલેક્ટ્રોનિક્સના સહયોગથી ગુજરાતના સાણંદમાં પ્લાન્ટ બનાવશે. આ સેમિકન્ડક્ટર પ્લાન્ટ 7,600 કરોડ રૂપિયાના ખર્ચે બનાવવામાં આવશે. અહીં દરરોજ 1.5 કરોડ ચિપ્સ બનાવી શકાય છે. તેનાથી 20 હજાર લોકોને પ્રત્યક્ષ રોજગાર મળશે અને આડકતરી રીતે 60 હજાર લોકોને રોજગાર મળશે.
રેનેસાસ એ એક અગ્રણી સેમીકન્ડક્ટર કંપની છે જે વિશિષ્ટ ચિપ્સ પર કેન્દ્રિત છે. તે 12 સેમીકન્ડક્ટર સુવિધાઓનું સંચાલન કરે છે અને માઇક્રોકન્ટ્રોલર્સ, એનાલોગ, પાવર અને સિસ્ટમ ઓન ચિપ (‘ એસઓસી)’ ઉત્પાદનોમાં મહત્વપૂર્ણ ભૂમિકા ભજવે છે.
ક્યાં ઉપયોગમાં લેવાશે : સીજી પાવર સેમીકન્ડક્ટર યુનિટ કન્ઝ્યુમર, ઇન્ડસ્ટ્રીયલ, ઓટોમોટિવ અને પાવર એપ્લિકેશન્સ માટે ચિપ્સનું ઉત્પાદન કરશે.
આ એકમો ડાઉનસ્ટ્રીમ ઓટોમોટિવ, ઇલેક્ટ્રોનિક્સ ઉત્પાદન, ટેલિકોમ ઉત્પાદન, ઔદ્યોગિક ઉત્પાદન અને અન્ય સેમિકન્ડક્ટર ઉપભોક્તા ઉદ્યોગોમાં રોજગારીના સર્જનને વેગ આપશે.
ભારતમાં સેમિકન્ડક્ટર્સ અને ડિસ્પ્લે મેન્યુફેક્ચરિંગ ઇકોસિસ્ટમના વિકાસ માટેના કાર્યક્રમને 21.12.2021ના રોજ નોટિફાઇડ કરવામાં આવ્યો હતો, જેમાં કુલ રૂ. 76,000 કરોડનો ખર્ચ થશે. કેન્દ્રીય કેબિનેટે ગુજરાતના સાણંદમાં સેમિકન્ડક્ટર યુનિટ સ્થાપવા માટે માઇક્રોનની દરખાસ્તને મંજૂરી આપી હતી. આ નિર્માણ ઝડપી ગતિએ આગળ વધી રહ્યું છે અને આ સાથે જ એક મજબૂત સેમીકન્ડક્ટર ઇકોસિસ્ટમ ઉભરી રહી છે.
