દિલ્હીમાં કર્ણાટક કોંગ્રેસ નેતાઓનું પ્રદર્શન, સિદ્ધારમૈયાએ કેન્દ્ર સરકાર પર લગાવ્યા આરોપ

• ડેપ્યુટી સીએમ ડીકે શિવકુમારે કહ્યું કે કર્ણાટક આ દેશને સૌથી વધુ આવક આપતું બીજું સૌથી મોટું રાજ્ય
• અમે અમારા હિસ્સાની માંગ કરી રહ્યા છીએ. અમે બધા અહીં કર્ણાટકના લોકો માટે લડી રહ્યા છીએ
• કોંગ્રેસનો દાવો, કેન્દ્ર સરકારના અન્યાયને કારણે કર્ણાટક સરકારને 2017-18થી અત્યાર સુધીમાં 1.87 લાખ કરોડ રૂપિયાની આવકનું નુકસાન થયું

કર્ણાટકની કોંગ્રેસ સરકાર દ્વારા આજે દિલ્હીના જંતર-મંતર ખાતે કેન્દ્રીય નેતૃત્વ સામે ‘ચલો દિલ્હી’ વિરોધ પ્રદર્શનનું આહ્વાન કરવામાં આવ્યું છે. ભાજપ વિરુદ્ધ આક્રમક વલણ દાખવી રહી છે. મુખ્ય પ્રધાન સિદ્ધારમૈયાના નેતૃત્વવાળી સરકારે કેન્દ્ર સરકાર પર આર્થિક અત્યાચાર અને અન્યાયનો આરોપ લગાવીને રાષ્ટ્રીય રાજધાનીમાં વિરોધ પ્રદર્શનનું આયોજન કર્યું છે.

દેશમાં ટેક્સ કલેક્શનમાં કર્ણાટક બીજા નંબરે
કર્ણાટક ભારત દેશમાં ટેક્સ કલેક્શનમાં બીજા નંબરે છે, મહારાષ્ટ્ર નંબર વન પર છે. વાસ્તવમાં, આ વર્ષે કર્ણાટક ટેક્સ તરીકે રૂ. 4.30 લાખ કરોડથી વધુનું યોગદાન આપી રહ્યું છે. જો આપણે રૂ. 100 ટેક્સ તરીકે એકત્રિત કરીએ અને ભારત સરકારને આપીએ, તો આપણને માત્ર રૂ. 12-13 પાછા મળે છે.

કોંગ્રેસનો દાવો 1.87 લાખ કરોડ નુકસાન
કોંગ્રેસનો દાવો છે કે કેન્દ્ર સરકારના અન્યાયને કારણે કર્ણાટક સરકારને 2017-18થી અત્યાર સુધીમાં 1.87 લાખ કરોડ રૂપિયાની આવકનું નુકસાન થયું છે.

કોંગ્રેસના મંત્રીઓ અને નેતાઓનું શું કહેવું છે

સીએમ સિદ્ધારમૈયા પણ કેન્દ્ર સરકારના વિરોધમાં ભાગ લેવા દિલ્હીના જંતરમંતર પહોંચ્યા છે. અહીં પત્રકારો સાથે વાત કરતાં તેમણે કહ્યું, ‘અમને આશા છે કે સરકાર અમારા વિરોધને સાંભળશે. અમારો મુખ્ય ઉદ્દેશ્ય રાજ્ય અને તેના લોકોના હિતોનું રક્ષણ કરવાનો છે.

ડેપ્યુટી સીએમ ડીકે શિવકુમારે કહ્યું, ‘કર્ણાટક બીજું સૌથી મોટું રાજ્ય છે, જે આ દેશને સૌથી વધુ રેવેન્યુ આપે છે. અમે અમારા હકની માંગ કરી રહ્યા છીએ, અમે અમારા હિસ્સાની માંગ કરી રહ્યા છીએ. અમે અહીં એ બતાવવા આવ્યા છીએ કે અમે બધા કર્ણાટકના લોકો માટે લડી રહ્યા છીએ.

પહેલા પણ શિવકુમારે કહ્યું હતું કે, ‘અમે અમારો અધિકાર માંગી રહ્યા છીએ, અમને ગમે તેટલી ટકાવારી મળવી જોઈએ, અમને 13 ટકા મળી રહ્યા છે. અન્ય રાજ્યોને લાભ મળે તેની મને પરવા નથી. તેમણે (કેન્દ્ર) ગુજરાતને જે પણ નીતિઓ અને યોજનાઓ આપી છે, તે આપણે પણ આપવી જોઈએ.
મંત્રી પ્રિયંક ખડગેએ કહ્યું, ‘ચાર-પાંચ માંગણીઓ છે. અમે ટેક્સને લઈને થઈ રહેલા અન્યાય સામે લડી રહ્યા છીએ. આ સિવાય અમને દુષ્કાળ રાહતની રકમ મળી રહી નથી. અમે આ બધાનો વિરોધ કરી રહ્યા છીએ. કેન્દ્રએ સમજવું જોઈએ કે કર્ણાટક આર્થિક મહાસત્તા છે.

મંત્રી રામલિંગા રેડ્ડીએ કહ્યું, ‘કેન્દ્ર સરકારે અમારા રાજ્યમાંથી લગભગ 4,50,000 રૂપિયાનો ટેક્સ વસૂલ્યો છે, પરંતુ અમને માત્ર 50,000 રૂપિયા જ મળી રહ્યા છે. આ વર્ષે 236 તાલુકામાંથી 220 તાલુકાને દુષ્કાળગ્રસ્ત જાહેર કરવામાં આવ્યા છે. અત્યાર સુધી કર્ણાટક માટે એક રૂપિયો પણ બહાર પાડવામાં આવ્યો નથી.

કોંગ્રેસના નેતા શ્રીનિવાસ બીવીએ કહ્યું, ‘આજે સમગ્ર કર્ણાટક કેબિનેટ કર્ણાટક સરકારને યોગ્ય ટેક્સની રકમ ચૂકવવાની માંગ સાથે કેન્દ્ર સામે વિરોધ કરવા દિલ્હી આવી છે. નાણામંત્રી ચર્ચા માટે તૈયાર નથી. કેન્દ્ર દ્વારા કરવામાં આવતા અન્યાય સામે મુખ્યમંત્રી અને કોંગ્રેસના અન્ય નેતાઓ અહીં જંતર-મંતર ખાતે વિરોધ પ્રદર્શન કરશે.

મંત્રી કેએચ મુનિયપ્પાએ કહ્યું, ‘અમે સરકારથી નારાજ નથી. ભારત સરકારે કર્ણાટકમાં દુષ્કાળની સ્થિતિનો અભ્યાસ કરવા અને અહેવાલ આપવા માટે નિષ્ણાત સમિતિ મોકલી છે. અંતે, મુખ્યમંત્રીએ દુષ્કાળની સ્થિતિ અંગે ચિંતિત ગૃહમંત્રીને મળ્યા હતા અને ગૃહમંત્રીએ ખાતરી આપી હતી કે તેઓ ભંડોળ બહાર પાડશે. આજદિન સુધી, તેઓએ ભંડોળ બહાર પાડ્યું નથી. અમે પૈસા મેળવવા માટે તમામ પ્રયાસો કર્યા છે. આ છેલ્લો ઉપાય છે, અમારે વિરોધ કરવાનો છે.