આરોપી રામવીર નીતિન ફૌજીનો નજીકનો મિત્ર, રામવીરે જ નીતિન ફોજી માટે જયપુરમાં તમામ વ્યવસ્થા કરી હતી: પોલીસ
હત્યાકાંડ બાદ હત્યારાઓને ભાગવામાં રામવીરે જ કરી હતી મદદ, શૂટર નીતિન ફોજી સાથે છે કનેક્શન
શ્રી રાષ્ટ્રીય કરણી સેનાના અધ્યક્ષ સુખદેવ સિંહ ગોગામેડી હત્યાકાંડમાં પોલીસે પાંચ દિવસ બાદ આજે પહેલી ધરપકડ કરી છે. પોલીસ કમિશનર બીજૂ જોર્જ જોસેફે જણાવ્યું છે કે, ગોગામેડી હત્યાકાંડના ષડયંત્રકારીઓમાં સામેલ એક આરોપી રામવીરની ધરપકડ કરી લીધી છે. તેમણે જણાવ્યું છે કે, આરોપી રામવીરે જ નીતિન ફોજી માટે જયપુરમાં તમામ વ્યવસ્થા કરી હતી.
શ્રી રાષ્ટ્રીય કરણી સેનાના અધ્યક્ષ સુખદેવ સિંહ ગોગામેડીની 5 ડિસેમ્બરે નીતિન ફોજી અને રોહિત રાઠોડે શ્યામ નગર સ્થિત તેમના નિવાસ સ્થાને અંધાધૂંધ ફાયરિંગ કરી હત્યા કરી હતી. નીતિન ફોજી માટે આરોપી રામવીરે જ જયપુરમાં તમામ વ્યવસ્થા કરી હતી. એડિશનલ પોલીસ કમિશનર કૈલાશ ચંદ્ર બિશ્નોઈએ કહ્યું કે આરોપી રામવીર શૂટર નીતિન ફૌજીનો નજીકનો મિત્ર છે.
પોલીસે જણાવ્યું કે એક મહિના પહેલા એટલે કે 9મી નવેમ્બરના રોજ નીતિન ફૌજી અને તેના સાથીઓએ મહેન્દ્રગઢના સદર પોલીસ સ્ટેશનની પોલીસ પાર્ટી પર ગોળીબાર કરીને ભાગી ગયા હતા. નીતિન ફૌજી ફરાર થયો તે દરમિયાન પોતાના મિત્ર રામવીરને 19 નવેમ્બરે જયપુર મોકલ્યો હતો. બિશ્નોઈએ જણાવ્યું કે રામવીરે નીતિન ફૌજીને જયપુરમાં હોટલમાં અને તેના પરિચિતના ફ્લેટમાં રહેવાની વ્યવસ્થા કરી હતી.
પોલીસે જણાવ્યું કે, રામવીર સિંહ અને નીતિન ફોજીના ગામ નજીક નજીક છે. રામવીર હરિયાણાના મહેન્દ્રગઢના ગામ સુરેતી પિલાનિયાંના રહેવાસી છે. બંને 12માં ધોરણમાં એક જ સ્કૂલમાં ભણતા હતા. 12મું પાસ કર્યા બાદ નીતિન ફોજી વર્ષ 2019-20માં સેનામાં જોડાયા હતા. ત્યારે, રામવીરે જયપુરના માનસરોવર સ્થિત વિલ્ફ્રેડ કોલેજથી વર્ષ 2017થી 2020 સુધી B.Sc અને વર્ષ 2021થી 2023માં વિવેક પીજી જયપુરથી M.A.Sc કર્યું. રામવીર એપ્રિલ 2023માં M.Scની છેલ્લી પરીક્ષા આપવા ગામ ચાલ્યો ગયો હતો, જ્યારે નીતિન ફોજી રજા પર આવ્યો હતો.
પોલીસે જણાવ્યું કે આરોપી રામવીરે હત્યાકાંડ બાદ અજમેર રોડથી નીતિન ફૌજી અને રોહિત રાઠોડને બાઇક પર બેસાડીને બગરુ ટોલ પ્લાઝાથી આગળ નાગૌર ડેપોની રાજસ્થાન રોડવેઝની બસમાં બેસાડીને ભાગવામાં મદદ કરી હતી. આરોપી રામવીરની તેના ઘરે થી ધરપકડ કરવામાં આવી હતી.
