વડોદરા-દાહોદ મેમુ ટ્રેનને રેલવે રાજ્યમંત્રી દર્શના જરદોશે લીલી ઝંડી આપીને પ્રસ્થાન કરાવ્યું, ટ્રેનમાં સોલર સિસ્ટમ લગાવવામાં આવી

એનાઉન્સમેન્ટ સિસ્ટમ, ડિજિટલ ડિસ્પ્લે, બાયો ટોઇલેટ, CCTV સહિતની સેવાઓથી ટ્રેનને સજ્જ કરવામાં આવી

ગુજરાતનાં લોકોને વધુ એક મેમુ ટ્રેનની ભેટ મળી છે. રેલવે રાજ્યમંત્રી દર્શના જરદોશે વડોદરા-દાહોદ મેમુ ટ્રેનને આજે સવારે 9.50 વાગ્યે લીલી ઝંડી આપીને પ્રસ્થાન કરાવ્યું હતું. આ ટ્રેન દરેક નાનાં-નાનાં સ્ટેશનો કવર કરશે. 950 મુસાફરની કેપેસિટી સાથે 1100 જેટલા લોકો ઊભા ઊભા મુસાફરી કરી શકશે. રેલવે રાજ્યમંત્રી દર્શના જરદોશ અને સાંસદ રંજનબેન ભટ્ટ આજરોજ વડોદરા-દાહોદ મેમુને સવારે પ્રસ્થાન કરાવ્યું હતું. આ ટ્રેનમાં કેટલીક વિશેષ સુવિધા મુસાફરોને જોવા મળશે, જેમાં મુંબઈની સમર્પણ ટ્રેનની જેમ એનાઉન્સમેન્ટ સિસ્ટમ, ડિજિટલ ડિસ્પ્લે, સીસીટીવી કેમેરા અને બાયો ટોઇલેટની સુવિધા છે. આ ટ્રેન 12 કોચ સાથે ચલાવાશે. જેમાં એક મહિલા સ્પેશિયલ કોચ પણ સામેલ હશે. આ ટ્રેનની મેક્સિમમ સ્પીડ 110 કિ.મી.ની રહેશે.

ટ્રેનના સમય અંગે વડોદરા ડિવિઝનના ડીઆરએમ જિતેન્દ્ર સિંહે જણાવ્યું હતું કે 26મી સપ્ટેમ્બરના રોજ ટ્રેન 09115 વડોદરા-દાહોદ મેમુ વડોદરાથી સવારે 9:30 વાગ્યે ઊપડશે અને બપોરે 13:25 વાગ્યે દાહોદ પહોંચશે. નિયમિત સેવા તરીકે, ટ્રેન નં. 09105 (ઓરિજિનલ ટ્રેન 69223) વડોદરા-દાહોદ મેમુ 27 સપ્ટેમ્બર, 2023થી દરરોજ સવારે 8:45 કલાકે વડોદરાથી ઊપડશે અને બપોરે 12:45 કલાકે દાહોદ પહોંચશે. બદલામાં, ટ્રેન 09106 (મૂળ ટ્રેન 69234) દાહોદ- વડોદરા મેમુ દાહોદથી દરરોજ 15:50 કલાકે ઊપડશે અને 19:55 કલાકે વડોદરા પહોંચશે.

આ ટ્રેનની ખાસ વિશેષતા એ છે કે આ ટ્રેનમાં સોલર સિસ્ટમ લગાવવામાં આવી છે, જેથી આ ટ્રેન વીજળી ઉત્પન્ન કરશે, જેથી 30 ટકા જેટલી વીજળીની બચત થશે. આ સાથે એનાઉન્સમેન્ટ સિસ્ટમ, ડિજિટલ ડિસ્પ્લે, બાયો ટોઇલેટ, CCTV સહિતની સેવાઓથી ટ્રેનને સજ્જ કરવામાં આવી છે.