સાળંગપુર મંદિર ખાતે હનુમાનજીને દાસ તરીકે દર્શાવતા હિન્દુ ધર્મના સાધુ સંતોએ ઉગ્ર વિરોધ દર્શાવ્યો

બોટાદ જિલ્લામાં આવેલ સાળંગપુર હનુમાનજી મંદિરમાં આવેલી કિંગ ઓફ્ સાળંગપુરની ભવ્ય પ્રતિમાને લઈને વિવાદ વકર્યો છે. કિંગ ઑફ સાળંગપુરની પ્રતિમાની નીચે હનુમાન દાદા સ્વામિનારાયણના સંતને નમન કરતા હોય એવા ભીંતચિત્રો સામે આવતાં સાધુ-સંતો, વિશ્વ હિન્દુ પરિષદ તેમજ સનાતન પ્રેમીઓમાં ભારે રોષ જોવા મળી રહ્યો છે. સનાતન ધર્મના સંતો આ તસવીરોની નિંદા કરી કહ્યા છે. આ મામલે સનાતન ધર્મ સેવા સમિતિએ સિહોર પોલીસમાં અરજી કરી છે.

સાળંગપુર હનુમાનજી મંદિર ખાતે હનુમાનજી મહારાજની 54 ફૂટની ભવ્ય પ્રતિમા સ્થાપિત કરવામાં આવી છે. કિંગ ઓફ સાળંગપુર પ્રતીમાની નીચે બનેલી કણપીઠમાં શિલ્પચિત્રો કંડારવામાં આવ્યા છે, ખાલી જગ્યા પર લગાવેલ પ્રતિમાઓમાં હનુમાનજી દાદાને સહજાનંદ સ્વામીના દાસ તરીકે ચિતરવામાં આવ્યા હોવાનું તથા હનુમાનજી સહજાનંદ સ્વામી સામે હાથ જોડીને નમસ્કાર મુદ્રામાં ઉભા હોય તેવું દર્શાવવામાં આવ્યું છે. આ સિવાય અન્ય એક ભીંતચિત્રમાં એક આસન પર બેઠાં નજરે પડે છે, જ્યારે હનુમાનજી નીચે હાથ જોડીને નમસ્કાર મુદ્રામાં બેઠા હોય તેવું દર્શાવવામાં આવ્યું છે. હનુમાનલીને દાસ તરીકે બતાવતા હિન્દુ ધર્મના વિવિધ સંગઠનો આક્રમક બન્યા છે.

સાળંગપુર હનુમાનજી મંદિરે અંકિત કરવામાં આવેલી કેટલીક ભીંત કૃતિઓ મૂળ ધાર્મિક વાતો કરતા વિપરીત રીતે દર્શાવવામાં આવી હોવા બાબતે વિવાદના બીજ રોપાયા છે. આ મામલો વધુ ગરમાશે તેવું લાગતા વડતાલ સ્વામિનારાયણ ટ્રસ્ટની મિટિંગ આજે મળવાની હતી પણ છેલ્લી ઘડીએ તે મિટિંગ રદ કરવામાં આવી હતી.

સાળંગપુર મંદિરમાં ભીંતચિત્રોને લઇ વિવાદ શરૂ થયો છે. જેમાં વિશ્વ હિન્દુ પરિષદ મેદાને આવ્યું છે. તેમાં VHPના આગેવાનો આજે વડતાલ જશે. સ્વામિનારાયણ મંદિરના સંતો સાથે મુલાકાત કરશે. જેમાં VHP મહામંત્રી અશોક રાવલનું નિવદેન છે કે વિશ્વ હિન્દુ પરિષદ હિન્દુઓની લાગણી સાથે રહેશે. VHP તમામને સાથે રાખવાનું કામ કરે છે. હનુમાનજી ત્રેતાયુગમાં થયા હતા. સ્વામિનારાયણ ભગવાન 300 વર્ષ પહેલા થયા હતા.

આ મુદ્દો સામે આવ્યા બાદ માત્ર સોશિયલ મીડિયામાં જ નહીં, પરંતુ કેટલાક હિંદુ સંગઠનોએ પણ આ ચિત્રો બદલ સ્વામિનારાયણ સંપ્રદાયનો વિરોધ કર્યો હતો. જુદા જુદા સંગઠનોના અધ્યક્ષોએ આ મામલે જણાવ્યું હતું કે, આ સનાતન સંસ્કૃતિનું અપમાન છે, સ્વામિનારાયણ સંપ્રદાય આ પ્રકારની ભૂલો વારંવાર કરે છે. આવુ દર્શાવશો તો આવનારી પેઢી એમ જ માનશે કે હનુમાનજી મહારાજ ભગવાન રામના નહીં પણ કોઈ એક સંપ્રદાયના સ્વામીના ભક્ત હતા. આ કોમેન્ટ સોશિયલ મીડિયામાં મુકાતા જ વિવાદ ચાલ્યો છે. સૌપ્રથમ સોશિયલ મીડિયામાં વિરોધ શરૂ થયો હતો ત્યારબાદ સમગ્ર ગુજરાતમાં આનો વિરોધ થઈ રહ્યો છે.

હનુમાનજી મહારાજને દાસ તરીકે દર્શાવાતા સનાતન ધર્મનાં સાધુ સંતોએ પણ વિરોધ દર્શાવ્યો હતો અને તાત્કાલિક ધોરણે આવી તકતીઓ દૂર કરવામાં આવે તેવી માંગ કરવામાં આવી હતી. અને જો તાત્કાલિક ધોરણે આવી તકતીઓ દૂર કરવામાં નહીં આવે તો સાળંગપુર ખાતે મોટી સંખ્યામાં સાધુ સંતો પહોંચશે તેવી ચર્ચાએ પણ ભારે જોર પકડયું હતું.

આ મામલે બુધવારે મોરારિબાપુએ રોષ ઠાલવ્યા બાદ આજે જૂનાગઢથી ઇન્દ્રભારતીબાપુ, ભારતી આશ્રમના 1008 મહામંડલેશ્વર હરિહરાનંદ મહારાજ અને મુચકુંદ ગુફાના 1008 મહામંડલેશ્વર મહેન્દ્રાનંદગિરિ મહારાજે પણ આ મામલે આક્રોશ ઠાલવ્યો છે. આ ભીંતચિત્રો હટાવી દેવાની માંગણી કરાઈ છે અને જો આ ચિત્રો નહીં હટે તો ટૂંક સમયમાં જલદ કાર્યક્રમો આપવાની ચીમકી ઉચ્ચારવામાં આવી છે.

મોરારિબાપુએ આ કૃત્યને કપટ ગણાવ્યું
લોકો કહે છે બાપુ તમે બોલો. હું બોલ્યો ત્યારે મારી સાથે કોઈપણ બોલ્યું નહોતું, હવે તમે બોલોઃ મોરારીબાપુ

હનુમાન દાદાના અપમાનને લઇ બુધવારે મોરારિબાપુએ આ કૃત્યને કપટ ગણાવ્યું હતું. મોરારિબાપુએ આક્રોશ સાથે જણાવ્યું હતું કે હનુમાનજીનું અપમાન ન ચલાવી લેવાય. લોકોએ જાગ્રત થવાની જરૂર છે. તેમણે વધુમાં જણાવ્યું હતું કે આજકાલ દુનિયામાં પોતાની શ્રેષ્ઠતા સિદ્ધ કરવા લોકો કેવાં કેવાં કપટ કરી રહ્યા છે. અમારા સૌરાષ્ટ્રમાં હનુમાનજીની એટલી સરસ મોટી મૂર્તિ છે અને એની નીચે ચિત્રમાં હનુમાનજી તેમનાં કોઈ મહાપુરુષને પ્રણામ કરતા, તેમની સેવા કરતા દેખાય છે. ત્યારે હવે વિચારો કે સમાજે જાગ્રત થવાની ખૂબ જ જરૂર છે. લોકો કહે છે બાપુ તમે બોલો. હું બોલ્યો ત્યારે મારી સાથે કોઈપણ બોલ્યું નહોતું, હવે તમે બોલો.

આ કંઈ ધર્મ કહેવાય? સંપ્રદાયોનો અને ધર્મનો દાટ વાળવા માટે સાધુ થયા છો? અમારે ઘેલા વાણિયા જેવું કરવું પડશે: ઈન્દ્રભારતીબાપુ

ઈન્દ્રભારતીબાપુએ આક્રોશ સાથે જણાવ્યું હતું કે સાળંગપુરની અંદર હનુમાનજી મહારાજની મૂર્તિ બેસાડી એનું આપણે ગૌરવ અનુભવીએ છીએ, પણ એની નીચે જે ઘનશ્યામજી પાંડે બેઠા છે અને હનુમાનજી મહારાજ તેમને હાથ જોડે છે. આ કંઈ વાજબી કહેવાય? આ કંઈ ધર્મ કહેવાય? આ ધર્મનો દાટ વાળવા માટે સાધુ થયા છો? સંપ્રદાયોનો દાટ વાળવા માટે સાધુ થયા છો? જે સનાતન ધર્મનાં દેવી-દેવતાઓને નીચે દેખાડે છે. આ બધી વસ્તુઓથી અમને દુ:ખ થાય છે. દર વખતે આવુ કંઈ કરીને પછી હું માફી માગું છું, અમે માફી માગીએ છીએ. અરે ભાઈ, આવું કરીને માફી જ માગવાની તમારે? સનાતનની અંદર તમે પોતે પણ સનાતની છો.
ઈન્દ્રભારતીબાપુએ વધુમાં જણાવ્યું, રામાનુજા ચાર્યના સંપ્રદાયમાંથી રામબલમાંથી છો અને એ જ ધર્મની અંદર તમે ટીકા કરો છો, તમે ખોટાં પુસ્તકો છાપો છો. આ વાજબી છે? મહેરબાની કરીને એ સાધુ-સંતોને નમ્ર અપીલ કરું છું કે આવા જે તકલાદી સાધુ-સંતો છે એ જરાક સમજે અને જો તેઓ કહે છે કે હનુમાનજી એ ભગવાન નથી, તો પછી શું કામ તેમની પૂજા કરો છો? જેમ સોમનાથની અંદર ગજની મંદિર તોડવા આવ્યો હતો ત્યારે ઘેલા વાણિયાએ મૂર્તિ ઉપાડીને ઘેલા સોમનાથની સ્થાપના કરી, તો અમારે પણ એ કરવું પડશે હવે. જ્યારે જુઓ ત્યારે વિવાદની અંદર.. જ્યારે વિવાદ થાય ત્યારે તેઓ માફી માગે અને અમે ક્ષમા કરી દઇએ.

આવાં ચિત્રોથી સનાતન ધર્મને ઠેસ પહોંચે, અગાઉ પણ ભગવાન રામ અને શિવનું અપમાન કર્યું: : હરિહરાનંદ મહારાજ

ભારતી આશ્રમના 1008 મહામંડલેશ્વર હરિહરાનંદ મહારાજે જણાવ્યું હતું કે હનુમાનજી આરાધ્ય દેવ છે, હનુમાનજી ન હોય તો સૃષ્ટિ ન હોય. તેમનાં એવાં ચિત્રો મૂક્યાં છે, જે નિંદાપાત્ર છે. હનુમાનજી સ્વામીને પગે લાગે છે, હનુમાનજી દાસ થઇને રહે છે. આ ચિત્રો નિંદાને પાત્ર છે, આનાથી સનાતન ધર્મને ઠેસ પહોંચે છે. એનો અમે સખત વિરોધ કરીએ છીએ.
હરિહરાનંદ મહારાજે વધુમાં જણાવ્યું હતું કે ભગવાન રામ અને શિવનું આની પહેલાં આપ્યું હતું કે શિવ સ્વામિનારાયણ ભગવાનને પગે લાગવા આવ્યા, રામનું પણ આપ્યું હતું. અવારનવાર માતાજીનું આપે છે કે માતાજી છે, તે શ્રીજી મહારાજ થકી જ છે. અમે કોઇ ધર્મની નિંદા નથી કરતા, સનાતન ધર્મ હતો, છે અને રહેશે. તમામ ધર્મો સનાતન ધર્મના ફાંટા છે. સ્વામિનારાયણને પણ ગુરુ તો કરવા જ પડ્યા હતા અને શિક્ષાપત્રીમાં પણ આવાં કોઇ ચિત્રો નથી દર્શાવ્યાં છતાંય આવું થાય છે. આ ધર્મ તો 200 વર્ષથી છે, જ્યારે સનાતન તો અનંત કાળથી છે. હનુમાનજી યુગોથી છે. અમારા આરાધ્ય દેવને નીચા દેખાડવા એ યોગ્ય નથી. મહેરબાની કરીને તમે તમારી લીટી લાંબી કરવા બીજાની લીટી ટૂંકી કરવાનો પ્રયત્ન ન કરો.

અમે ક્યારેય કોઈ ખરાબ ટિપ્પણી નથી કરતા, અમે બધા મર્યાદા મૂકીએ એમાં મજા નહીં રહે: મહેન્દ્રાનંદગિરિ મહારાજ

મુચકુંદ ગુફાના 1008 મહામંડલેશ્વર મહેન્દ્રાનંદગિરિ મહારાજે જણાવ્યું હતું કે સાળંગપુરમાં ફરી પાછો વિવાદ ઊભો કર્યો છે. શું કામ આવું કરો છો? આ સંપ્રદાય સનાતનમાંથી નીકળેલો એક ભાગ છે. આપના સંપ્રદાયના મહાપુરુષો મહાદેવને, હનુમાનજીને ખૂબ માનતા.. કોઈ સનાતની સાધુઓ સ્વામિનારાયણ સંપ્રદાયના મહાપુરુષો વિશે ક્યારેય કોઈ ખરાબ ટિપ્પણી નથી કરતા. નથી કોઇ પુસ્તકો કે તમારા ધાર્મિક ગ્રંથોમાં છેડછાડ કરી, નથી તમારા ખરાબ ચલચિત્રો મૂક્યાં. તો તમે શું કામ આવું કરો છો? માપે રહોને ભલા માણસ, એમાં મજા આવશે.
મહેન્દ્રાનંદગિરિ મહારાજે વધુમાં જણાવ્યું હતું કે તમે સંતો તરીકે સમાજમાં પ્રતિષ્ઠિત થયેલા છો, તો સંતોની ભૂમિકા અને વિવેકને શું કામ તોડો છો? આવું કરશો તો લોકો અને સમાજ તમારો સ્વીકાર નહીં કરે.. જે લોકો સંપ્રદાયને માને છે તેઓ સનાતન ધર્મમાંથી આવેલા છે. આ નથી સારું કરી રહ્યા, તમારી મર્યાદામાં રહો અને અમને અમારી મર્યાદામાં રહેવા દો. અમે બધા મર્યાદા મૂકીએ એમાં મજા નહીં રહે. આપણે અંદરોઅંદર આવા બધા વિષયોને લઇને ઝઘડીએ એવું ઘણા ઇચ્છે છે. શું કામ તમે એ લોકોને તક આપો છો? સનાતન એ સનાતન છે, એ સર્વોપરિ છે.
તેમણે કહ્યું હતું કે તમે આવો વિવાદ ઊભો કરીને શું સાબિત કરવા માગો છો. અવિવેકી અમુક સંતો છે… તેઓ માપમાં રહે તો મજા આવશે અને અમને અમારી મર્યાદા મૂકવામાં મજબૂર ના કરશો, નહીંતર મજા નહીં આવે. તમે હનુમાનજી મહારાજને નીચે દેખાડવાનો પ્રયત્ન કર્યો છે, એ તસવીરો જલદી હટાવો. જેટલા પણ સાળંગપુરમાં આવે છે એ બધા સનાતનીઓ હનુમાનજી મહારાજને લઇને આવે છે એ યાદ રાખજો. સ્વામિનારાયણ સંપ્રદાયને લઈને આવે એવો ભ્રમ હોય તો મનમાંથી કાઢી નાખજો. જો આ સનાતનીઓ આ વાતને માથે લઇ લેશે તો બહુ ભારે પડશે, માટે પાછા વળી જાઓ.

સનાતનને નીચું ન દેખાડો.. આજે બીજા ઘણા વિવિધ ધર્મના માણસો રાજી થાય છે કે આ લોકો અંદરોઅદર ઝઘડે છે. શું કામ બીજાને રાજી કરો છો? : ઈન્દ્રભારતીબાપુ
અપીલ કરતાં ઈન્દ્રભારતીબાપુએ જણાવ્યું હતું કે મહેરબાની કરીને હું તમને હાથ જોડીને માફી માગું છું કે તમે અમારા સંપ્રદાયના સાધુ છો, સનાતની છો એટલે મહેરબાની કરીને આવું ન કરો, સનાતનને નીચું ન દેખાડો.. આજે બીજા ઘણા વિવિધ ધર્મના માણસો રાજી થાય છે કે આ લોકો અંદરોઅદર ઝઘડે છે. શું કામ બીજાને રાજી કરો છો? તમે ઘનશ્યામ પાંડેને માનો છો કે એ ભગવાન છે, તેમને માનો, અમારો એમાં કોઇ વિરોધ નથી, ગુરુ ભગવાન જ છે, પણ અમારાં દેવી-દેવતાઓને નીચાં દેખાડવાનો પ્રયત્ન કરો એ વાજબી નથી. એના પ્રત્યાઘાત સમાજમાં બહુ પડી રહ્યા છે. સમાજના ફોન આવે છે કે બાપુ, આ શું છે? અમારે શું જવાબ દેવા? અમને પૂછવાવાળા છે સમાજમાં કે શું કામ ભગવા પહેરીને બેઠા છો? તમારાથી કંઈ નથી થતું..? એટલે મહેરબાની કરીને જે મૂર્તિની પ્રતિકૃતિ કરી છે એ હટાવી દો, જેથી ભગવાન હનુમાનના અનુયાયીઓને ઠેસ ન પહોંચે..

આ વિવાદાસ્પદ ભીંતચિત્રો હટાવી યોગ્ય તકતીઓ લગાવવી જોઇએ : જગદેવદાસબાપુ
બરવાળા લક્ષ્મણજી મંદિરના મહંત મહામંડલેશ્વર જગદેવદાસબાપુએ જણાવ્યું હતું કે સ્વામીનારાયણને હાથ જોડી હનુમાનજી પ્રણામ કરતા હોય એવી પ્રતિમા યોગ્ય નથી. હનુમાનજી તો ભગવાન રામના અનુયાયી છે એવા પ્રકારની મૂર્તિ મૂકવી જોઈએ. ભારતીય સંસ્કૃતિ સનાતન ધર્મના હિતમાં સંસ્કૃતિ જળવાઈ રહે તેમજ અનુયાયીઓ અને યુવા પેઢીના હિતમાં યોગ્ય પ્રતિમા મૂકવી જોઇએ. સ્વામિનારાયણ સંપ્રદાયના સંતો અને લોકોને મૂર્તિઓ તથા ધાર્મિક લાગણીઓનું ધ્યાન રાખવું જોઈએ. આવા વિવાદમાં ન પડવું જોઈએ. સ્વામિનારાયણ સંપ્રદાય દ્વારા અગાઉ પણ અનેક આવાં કર્મો કર્યાં બાદ વિવાદ થાય પછી માફી માગી લેતા હોય છે. સ્વામિનારાયણ સંપ્રદાય વિવાદની જગ્યાએ સમાજનું ઉત્થાન થાય એવાં કરવાં જોઇએ. આ વિવાદાસ્પદ ભીંતચિત્રો હટાવી યોગ્ય તકતીઓ લગાવવી જોઇએ.

અન્ય સમાચાર માટે નીચે આપેલી લીંક ઉપર ક્લીક કરો.

સાળંગપુરમાં સ્વામી-ભક્તો વચ્ચે ચકમક જરી, પોલીસનાં ધાડાં ઉતારાયાં, ભીંતચિત્રો નજીક બેરિકેડ્સ લગાવાયાં